ڈارٹ ماؤتھ (نیوز ڈیسک)
: عام طور پر اگر بٹوہ گم ہو جائے تو کچھ ہی دنوں میں اس کے واپس ملنے کے امانات ختم ہو جاتے ہیں، تاہم کینیڈا میں ایک ایسا حیرت انگیز واقعہ سامنے آیا ہے جہاں ایک شہری کو اپنا گمشدہ والٹ 51 سال بعد واپس مل گیا۔تفصیلات کے مطابق کینیڈا کے علاقے ڈارٹ ماؤتھ کے رہائشی رچرڈ گیلوری کا بٹوہ 1975ء میں گم ہو گیا تھا۔ حال ہی میں ایک گھر کی مرمت کے دوران میٹی گولڈ اسمتھ نامی کارپینٹر کو یہ والٹ فرش کے نیچے سے ملا۔ بٹوے کے اندر سے ڈرائیونگ لائسنس، ہائی اسکول آئی ڈی، ہاتھ سے لکھا برتھ سرٹیفکیٹ، ایک ڈالر کا نوٹ اور 1975ء کے ایک تھیٹر ڈرامے کا ٹکٹ برآمد ہوا۔میٹی گولڈ اسمتھ نے بٹوے کے مالک کی تلاش کے لیے سوشل میڈیا پر پوسٹ شیئر کی، جس کی مدد سے ڈونا گیلوری نامی خاتون نے بٹوے میں موجود اشیاء سے اپنے شوہر کو شناخت کر لیا۔ یوں نصف صدی سے زائد عرصے بعد یہ والٹ دوبارہ رچرڈ گیلوری کو مل گیا۔رچرڈ گیلوری نے بٹوے کی واپسی پر خوشی اور حیرت کا اظہار کرتے ہوئے کہا کہ انہیں بٹوہ گم ہونے کا واقعہ تو یاد تھا، تاہم 51 سال بعد بٹوے میں موجود پرانی یادگاریں دیکھ کر وہ بے حد متعجب اور مسرور ہیں۔