چندی گڑھ / نئی دہلی:سیاست کے میدان میں بڑے بڑوں کو چکمہ دینے والے سیاستدان بسا اوقات ذاتی زندگی میں ایسے دھوکے کھا جاتے ہیں کہ عقل دنگ رہ جائے۔ بھارتی پنجاب میں حکمران عام آدمی پارٹی (اے اے پی) کے رہنما امرندر سنگھ منڈوفل کے ساتھ بھی کچھ ایسا ہی سنسنی خیز اور انوکھا دھوکہ ہوا ہے، جہاں ایک خاتون خود کو افسر ظاہر کر کے ان کی زندگی میں آئیں اور شادی کے چند ماہ بعد ہی گھر کا سونا، چاندی اور دیگر قیمتی سامان لے کر ہوا ہو گئیں۔
میڈیا رپورٹس کے مطابق اے اے پی رہنما امرندر سنگھ نے پولیس کو دی گئی درخواست میں انکشاف کیا ہے کہ ان کی زندگی میں طوفان لانے والی خاتون (من وندر کور) کے اہل خانہ نے انہیں غیر شادی شدہ اور صوبائی سول سروس (PCS) کی ایک باوقار افسر کے طور پر متعارف کروایا تھا، جبکہ ان کی اصل عمر اور ماضی سے متعلق بھی سفید جھوٹ بولا گیا۔ دونوں کی شادی رواں سال فروری 2026 میں انتہائی دھوم دھام سے انجام پئی تھی، جس میں رشتہ داروں کے علاوہ پنجاب اسمبلی کی کئی نامور سیاسی شخصیات نے بھی بطور مہمان شرکت کی تھی اور اس شاہانہ تقریب کی تصاویر آج بھی سوشل میڈیا کی زینت بنی ہوئی ہیں۔
سیاستدان شوہر کو اس وقت شدید ذہنی دھچکا لگا جب شادی کی فضا بیٹھنے کے بعد انہیں معلوم ہوا کہ ان کی ‘افسر اہلیہ’ نہ صرف یہ کہ پہلے سے شادی شدہ اور طلاق یافتہ ہیں، بلکہ ان کا ایک 18 سالہ جوان بیٹا بھی ہے۔ امرندر سنگھ کا الزام ہے کہ محترمہ رفاقتیں نبھانے کے بجائے گھر کا سونا اور دیگر قیمتی اثاثے سمیٹ کر خاموشی سے رفو چکر ہو چکی ہیں۔
متاثرہ رہنما کی مدعی پر مقامی پولیس نے فوری کارروائی کرتے ہوئے جعل سازی، فریب کاری اور دھوکہ دہی کے دفعات کے تحت خاتون سمیت کل 6 افراد کے خلاف مقدمہ درج کر لیا ہے۔ نامزد ملزمان میں فرار ہونے والی خاتون کے علاوہ ان کے بھائی، والدہ، کزن، بھابھی اور سابق گاؤں کا سرپنچ بھی شامل ہے، جنہوں نے اس پورے رشتے کا بندوبست کیا تھا۔ سیاسی حلقوں میں اس انوکھے فراڈ پر خوب چہ مگوئیاں ہو رہی ہیں کہ سیاستدانوں کو سیاست میں تو چالیں چلنا آتی ہیں، لیکن گھر کے اندر بچھائے گئے اس جال کا اندازہ وہ شاید خواب میں بھی نہیں لگا سکتے تھے۔
سیاستدان سے شادی کے بعد” پی سی ایس افسر دلہن” سونا اور قیمتی سامان لے کر رفو چکر ہو گئی
