فلوریڈا:برمودا سے بوسٹن جانے والا ایئر ایمبولینس گلف اسٹریم جی100 طیارہ بحر اوقیانوس کے اوپر سے اچانک لاپتہ ہوگیا، طیارے میں ایک مریض سمیت 6 افراد سوار تھے ایئر ٹریفک کنٹرول سے رابطہ منقطع ہونے کے بعد امریکی کوسٹ گارڈ نے طیارے اور اس میں سوار افراد کی تلاش کے لیے بڑے پیمانے پر سرچ اینڈ ریسکیو آپریشن شروع کردیا ہے.
امریکی ذرائع ابلاغ کے مطابق طیارہ برموداجزیرے سے امریکی شہر بوسٹن جارہا تھا جب بحر اوقیانوس پر پروازکے دوران اچانک ریڈار سے غائب ہوگیا امریکی حکام کے مطابق طبی امدادی طیارہ برمودا کے ایل ایف وید انٹرنیشنل ایئرپورٹ سے بوسٹن کے لیے روانہ ہوا تھا تاہم پرواز کے دوران ایئر ٹریفک کنٹرول سے طیارے کا رابطہ منقطع ہوگیا. حکام کے مطابق طیارے میں 2 پائلٹ، 2 طبی اہلکار، ایک مریض اور مریض کا ایک عزیز سوار تھا طیارہ بوسٹن کے لوگن انٹرنیشنل ایئرپورٹ جارہا تھا جہاں اسے طبی منتقلی کے لیے پہنچنا تھا امریکی فیڈرل ایوی ایشن ایڈمنسٹریشن کی جانب سے طیارے سے رابطہ ختم ہونے کی اطلاع ملنے کے بعد امریکی کوسٹ گارڈ کو متحرک کیا گیا حکام نے طیارے کی ممکنہ آخری موجودگی کے علاقے میں فوری طور پر فضائی اور سمندری تلاش شروع کردی.
امریکی کوسٹ گارڈ کے مطابق تلاش کا مرکز میساچوسٹس کے ساحل سے دور بحر اوقیانوس کا علاقہ ہے، جہاں طیارے کی ممکنہ آخری پوزیشن کا تعین کیا گیا ہے سرچ آپریشن میں طیارے، ہیلی کاپٹر، کشتیوں اور ایک تیز رفتار کٹر کو شامل کیا گیا ہے حکام کے مطابق طیارہ بوسٹن کے قریب پہنچ رہا تھا جب اس سے رابطہ منقطع ہوا طیارے کے مقررہ وقت پر بوسٹن نہ پہنچنے کے بعد صورتحال کو ہنگامی قرار دیتے ہوئے تلاش کا دائرہ وسیع کردیا گیا طیارے کو چلانے والی ایئر ایمبولینس کمپنی کے حکام نے بتایا ہے کہ کمپنی کی ٹیم مسلسل صورتحال کی نگرانی کر رہی ہے اور لاپتہ طیارے میں سوار تمام افراد کی بحفاظت بازیابی کے لیے امدادی اداروں کے ساتھ رابطے میں ہے.
برمودا سے بوسٹن جانے والا ایئر ایمبولینس طیارہ لاپتہ،بڑے پیمانے پر ریسکیو آپریشن
