شہید بینظیر بھٹو یونیورسٹی میں کمپیوٹر بیسڈ پری انٹری ٹیسٹ کا آغاز، 2 ہزار امیدوار اہل قرار

نواب شاہ (رپورٹ: نفیس آرائیں)

شہید بینظیر بھٹو یونیورسٹی، شہید بینظیر آباد میں نئے تعلیمی سیشن 2027ء کے لیے مختلف انڈر گریجویٹ، پوسٹ گریجویٹ اور پی ایچ ڈی پروگرامز میں داخلوں کا آن لائن کمپیوٹر بیسڈ پری انٹری ٹیسٹ باقاعدہ شروع ہو گیا ہے۔

وائس چانسلر پروفیسر ڈاکٹر مدد علی شاہ نے یونیورسٹی کے مختلف امتحانی مراکز کا دورہ کیا اور ٹیسٹ کے انتظامات کا جائزہ لیا۔ یونیورسٹی انتظامیہ کے مطابق مین کیمپس میں مرحلہ وار پری انٹری ٹیسٹ 2، 3 اور 4 اکتوبر 2026ء کو روزانہ صبح 9 بجے منعقد کیے جا رہے ہیں۔

ڈائریکٹر ایڈمیشن انجینئر محمد طفیل میمن نے بتایا کہ رواں سال تقریباً 2 ہزار امیدواروں کو داخلہ ٹیسٹ کے لیے اہل قرار دیا گیا ہے۔ طلبہ انفارمیشن ٹیکنالوجی، کمپیوٹر سائنس، آرٹیفیشل انٹیلیجنس، سائبر سیکیورٹی، لا اینڈ لیگل اسٹڈیز، بزنس ایڈمنسٹریشن، ایجوکیشن، میڈیا اسٹڈیز، کیمسٹری، جینیٹکس اینڈ مالیکیولر بائیولوجی، مائیکرو بائیولوجی، انگلش، سندھی، معاشیات، شماریات اور فائن آرٹس سمیت دیگر شعبوں میں داخلے کے لیے امتحان دے رہے ہیں۔

دیگر کیمپسز کے شیڈول کے حوالے سے بتایا گیا کہ سانگھڑ کیمپس میں پری انٹری ٹیسٹ 9 اور 10 اکتوبر جبکہ نوشہروفیروز کیمپس میں 17 اور 18 اکتوبر کو منعقد ہوں گے۔

ڈپٹی ڈائریکٹر محمد زمان راٹھوڑ اور سسٹم ایڈمن عماد اللہ ہیسابانی کے مطابق امتحانی شفافیت برقرار رکھنے کے لیے امیدواروں پر امتحانی ہال میں موبائل فون، کیلکولیٹر یا کسی بھی قسم کی الیکٹرانک ڈیوائس لانے پر مکمل پابندی عائد کی گئی ہے۔

وائس چانسلر پروفیسر ڈاکٹر مدد علی شاہ نے اس موقع پر گفتگو کرتے ہوئے کہا کہ یونیورسٹی ہمیشہ میرٹ اور شفافیت کو ترجیح دیتی ہے تاکہ تمام لائق اور اہل طلبہ و طالبات کو اعلیٰ تعلیم کے حصول کا مساوی اور بہترین موقع مل سکے۔