سکھر (رپورٹ: عبد الرحمان راجپوت) صوبہ سندھ میں زرعی اجناس کی قیمتوں میں شفافیت لانے اور عوام کو منڈی کے نرخوں کی درست معلومات کی فراہمی کے لیے ایگریکلچر مارکیٹنگ سسٹم کا آن لائن ٹریننگ سیشن منعقد کیا گیا۔
صوبائی وزیر زراعت محمد بخش مہر کی ہدایات پر "سندھ ایگریکلچر مارکیٹنگ سسٹم” (سوات) پراجیکٹ کے تحت سکھر کے نجی ہال میں منعقدہ تربیتی ورکشاپ میں سکھر ڈویژن کے متعلقہ افسران، عملے اور ماہرین نے شرکت کی۔
اس موقع پر پراجیکٹ ڈائریکٹر (سوات) امداد علی سہو اور ڈائریکٹر جنرل ایگریکلچر سپلائیز، پرائسز اینڈ مارکیٹنگ شہزاد علی پنہور نے آن لائن سسٹم پر تعارفی گفتگو کی۔ جبکہ ٹرینرز راحت اللہ میمن، عالیان قریشی، طلحہ عباسی، غلام قادر ارباب اور نثار احمد اوڈھو نے سسٹم کے مختلف فنی امور پر روشنی ڈالی۔
ورکشاپ سے خطاب کرتے ہوئے مقررین نے بتایا کہ پراجیکٹ کے تحت نیا پورٹل اور موبائل ایپ متعارف کرائی جا رہی ہے جس سے سندھ بھر کے عوام مستفید ہوں گے۔ اس ایپ کے ذریعے شہریوں کو معلوم ہو سکے گا کہ صوبے کے کس شہر میں کون سی زرعی مصنوعات کس قیمت پر فروخت ہو رہی ہیں۔
انہوں نے کہا کہ اس نظام کا بنیادی مقصد اشیائے خوردونوش کی قیمتوں میں یکسانیت و شفافیت لانا اور بہتر نگرانی کو یقینی بنانا ہے، تاکہ کسانوں، تاجروں اور عام صارفین کو منڈی کی درست قیمتوں تک آسان رسائی مل سکے۔