پولیس وین پنکچر ہونے پر ملزم کا فرار، پولیس پر فائرنگ کے بعد موٹر سائیکل حادثہ، ملزم قاری تنویر دوبارہ گرفتار
سیالکوٹ (سلیم احمد اعوان شیخو سے)
ڈسکہ میں بچے کے ساتھ بد اخلاقی میں ملوث ملزم قاری کو پولیس حراست سے چھڑوانے کی کوشش ناکام ہو گئی؛ فرار کے دوران موٹر سائیکل حادثے میں قاری کی ٹانگ ٹوٹ گئی جس کے بعد پولیس نے اسے زخمی حالت میں دوبارہ گرفتار کر لیا۔
تفصیلات کے مطابق چند روز قبل ڈسکہ میں اسسٹنٹ کمشنر کے دفتر سے ملحقہ مسجد نورِ مدینہ کے قاری تنویر نے ایک بچے کے ساتھ بد اخلاقی کی تھی، جس پر تھانہ سٹی ڈسکہ پولیس نے ملزم کو گرفتار کر لیا تھا۔
پولیس مذکورہ ملزم کو میڈیکل کے لیے تحصیل ہیڈ کوارٹر ہسپتال ڈسکہ لے جا رہی تھی کہ راستے میں پولیس کی گاڑی پنکچر ہو گئی۔ اسی اثنا میں قاری تنویر کے ساتھی اسے پولیس حراست سے چھڑوانے کے لیے پہنچ گئے۔ قاری وین سے چھلانگ لگا کر اپنے ساتھی کی موٹر سائیکل پر بیٹھ کر فرار ہونے لگا۔
پولیس نے تعاقب کرتے ہوئے موٹر سائیکل روکنے کی کوشش کی تو ملزم کے ساتھیوں نے پولیس ٹیم پر فائرنگ کر دی۔ تاہم کچھ ہی فاصلے پر موٹر سائیکل بے قابو ہو کر ڈیوائیڈر سے ٹکرا گئی، جس کے نتیجے میں قاری تنویر کی ٹانگ ٹوٹ گئی۔ پولیس نے قاری تنویر کو موقع پر زخمی حالت میں دوبارہ گرفتار کر لیا، جبکہ اس کے فرار ہونے والے ساتھیوں کی تلاش کے لیے چھاپے مارے جا رہے ہیں۔