نواب شاہ (رپورٹ: نفیس آرائیں) قائد عوام یونیورسٹی (QUEST) نواب شاہ میں طالبعلم عاقب عالمانی کے قتل کے مقدمے میں پولیس نے کارروائی کرتے ہوئے مرکزی ملزم کو گرفتار کرلیا، جبکہ پولیس کے مطابق ملزم نے دورانِ تفتیش قتل کا اعتراف بھی کرلیا ہے۔
ایس ایس پی شہید بینظیرآباد ڈاکٹر سمیر نور چنہ نے واقعے کا سخت نوٹس لیتے ہوئے ملزم کی فوری گرفتاری کے احکامات جاری کیے تھے۔ ڈی ایس پی صدر کی سربراہی میں ایس ایچ او تھانہ تعلقہ نواب شاہ پر مشتمل خصوصی پولیس ٹیم نے جدید ٹیکنالوجی اور پیشہ ورانہ مہارت کو بروئے کار لاتے ہوئے کارروائی کی اور مرکزی ملزم اشفاق علی ولد اعجاز علی بروہی کو گرفتار کرلیا۔
پولیس کے مطابق گرفتار ملزم تھانہ تعلقہ نواب شاہ کے مقدمہ نمبر 142/2026 میں مقتول عاقب عالمانی کے قتل کے الزام میں مطلوب تھا۔ مقدمے میں دفعہ 302، 364، 201 اور 34 تعزیراتِ پاکستان شامل کی گئی ہیں۔
دفعہ 302 کے تحت قتلِ عمد یعنی جان بوجھ کر کسی شخص کو قتل کرنا جرم ہے۔ دفعہ 364 قتل کی نیت سے کسی شخص کو اغوا یا زبردستی کہیں لے جانے سے متعلق ہے۔ دفعہ 201 جرم کے شواہد غائب کرنے یا ملزم کو قانونی سزا سے بچانے کی غرض سے غلط معلومات دینے سے متعلق ہے، جبکہ دفعہ 34 ایسی صورت میں لاگو ہوتی ہے جب متعدد افراد مشترکہ نیت کے تحت کسی جرم کے ارتکاب میں شریک ہوں۔
پولیس کا کہنا ہے کہ گرفتار ملزم نے دورانِ تفتیش قتل کا اعتراف کیا ہے، تاہم واقعے کے دیگر پہلوؤں، شواہد اور ممکنہ ساتھی ملزمان سے متعلق مزید تفتیش جاری ہے۔
ایس ایس پی شہید بینظیرآباد ڈاکٹر سمیر نور چنہ نے کارروائی پر ڈی ایس پی صدر اور ایس ایچ او تھانہ تعلقہ نواب شاہ کی کارکردگی کو سراہا۔