غزہ میں دھماکہ: ڈرون گرنے کے بعد معائنہ کرتے ہوئے دو اسرائیلی فوجی ہلاک، تمام جنگی ڈرونز گراؤنڈ

تل ابیب:شمالی غزہ کی پٹی میں ایک فوجی چوکی کے اندر پیش آنے والے ہولناک واقعے میں اسرائیلی دفاعی فورسز (IDF) کے دو ریزرو فوجی ہلاک ہو گئے ہیں۔ یہ حادثہ اس وقت پیش آیا جب یہ فوجی ایک ڈرون آپریشن مکمل کرنے کے بعد گرنے والے ڈرون کا معائنہ کر رہے تھے کہ اچانک اس میں دھماکہ ہو گیا۔
99 ویں ڈویژن کے کمانڈر بریگیڈیئر جنرل الاد تزوری کے مطابق ہلاک ہونے والے دونوں اہلکار 16ویں بریگیڈ سے تعلق رکھنے والے ریزرو میجر تھے، جن کی شناخت 24 سالہ ناداو کالی (Nadav Kali) اور 23 سالہ اوفیک موآلم (Ofek Moalem) کے طور پر کی گئی ہے۔ یہ دونوں فوجی اپنی دوسری پرواز کے دوران ڈرون حادثے کا شکار ہونے والے مقام کا جائزہ لے رہے تھے کہ ڈرون پھٹ گیا، جس کے نتیجے میں وہ شدید زخمی ہوئے اور اسپتال منتقلی کے دوران دم توڑ گئے۔ اس واقعے میں کسی اور فوجی کے زخمی ہونے کی اطلاع نہیں ملی۔
دوسری جانب، اسرائیلی فوج اس بات کی تحقیقات کر رہی ہے کہ آیا حماس نے برقی مقناطیسی اسپیکٹرم (electromagnetic spectrum) کا استعمال کرتے ہوئے اس ڈرون کو نیچے گرایا تھا یا نہیں۔ تاہم ابتدائی طور پر فوج کا ماننا ہے کہ حماس کے پاس اس نوعیت کی تکنیکی صلاحیتیں موجود نہیں ہیں۔ واقعے کی سنگینی کو دیکھتے ہوئے آئی ڈی ایف نے تمام جنگی اور بم گرانے والے ڈرونز کو اگلے احکامات تک تمام جنگی محاذوں پر عارضی طور پر گراؤنڈ (grounded) کر دیا ہے۔