سیالکوٹ (سلیم احمد اعوان شیخو): تھانہ کوتوالی کے علاقہ چوک علامہ اقبال سے ملحقہ نہال چند سٹریٹ میں ڈکیتی کی سنگین واردات پیش آئی ہے، جہاں دو نامعلوم مسلح ڈاکو "اعوان سائیکلز اینڈ بے بی سٹور” سے ساڑھے 6 لاکھ روپے لوٹ کر فرار ہو گئے۔
تفصیلات کے مطابق، مسلح ڈاکو دکان میں داخل ہوئے اور لوٹ مار کی کوشش کی۔ دکان کے مالکان کی جانب سے مزاحمت پر ملزمان نے ان پر شدید تشدد کیا اور اسلحہ کی نوک پر ساڑھے 6 لاکھ روپے نقد رقم چھین لی۔ ملزمان فرار ہوتے ہوئے ہوائی فائرنگ کرتے رہے اور دکانداروں کو سنگین نتائج کی دھمکیاں بھی دیں۔
اطلاع ملتے ہی تھانہ کوتوالی پولیس نے موقع پر پہنچ کر وقوعہ کا معائنہ کیا اور شواہد اکٹھے کیے۔ پولیس نے نامعلوم ڈاکوؤں کے خلاف مقدمہ درج کر کے تفتیش اور ملزمان کی تلاش شروع کر دی ہے جبکہ پولیس حکام نے ڈاکوؤں کی جلد گرفتاری کی بھی دہائی دی ہے۔