صوابی: CHIP کے زیرِ اہتمام سرویکل کینسر سے بچاؤ اور ویکسینیشن آگاہی مہم کا آغاز

صوابی (حق نواز خان)

سماجی ادارے CHIP کے زیرِ اہتمام صوابی جرگہ ہال (حجرہ حاجی زرولی خان) میں سرویکل کینسر سے بچاؤ اور ویکسینیشن کے حوالے سے آگاہی مہم کے افتتاحی ایونٹ کا انعقاد کیا گیا، جس میں صوابی پریس کلب (رجسٹرڈ) کے عہدیداران اور ممبران نے شرکت کی۔

سماجی بہبود رابطہ کونسل (SBRC) کے اشتراک سے منعقدہ اس تقریب میں CHIP کے ضلعی کوآرڈینیٹر یاسر خان، ڈسٹرکٹ ہیلتھ آفس صوابی کے ویکسینیشن انچارج ڈاکٹر انیس، فیصل خان اور روح الامین خان نے خصوصی شرکت کی۔

تقریب کے آغاز میں CHIP کے ضلعی کوآرڈینیٹر یاسر خان نے استقبالیہ کلمات ادا کیے جبکہ صدر صوابی پریس کلب سید عارف شاہ نے تمام شرکاء کا شکریہ ادا کیا۔

اس موقع پر ڈسٹرکٹ ہیلتھ آفس کے ویکسینیشن انچارج ڈاکٹر انیس نے صحافیوں کو سرویکل کینسر، اس سے بچاؤ اور ویکسینیشن کی اہمیت کے حوالے سے تفصیلی بریفنگ دی۔ انہوں نے صحافیوں سے اپیل کی کہ وہ اس خطرناک مرض کے تدارک کے لیے جاری آگاہی مہم میں اپنا مؤثر اور عملی کردار ادا کریں۔

واضح رہے کہ صوابی پریس کلب (رجسٹرڈ) سے وابستہ صحافی CHIP کی اس آگاہی مہم میں بطور میڈیا پارٹنر ذمہ داریاں انجام دے رہے ہیں اور سرویکل کینسر کی ویکسینیشن سے متعلق آگاہی کو عوام تک پہنچانے کے لیے اپنا صحافتی کردار ادا کریں گے۔