سیالکوٹ (سلیم احمد اعوان شیخو):
ماڈرن چلڈرن ہوم سیالکوٹ میں مقیم طالبات اور بچوں کے تحفظ اور انہیں محفوظ ماحول کی فراہمی کے موضوع پر ایک خصوصی آگاہی و تربیتی نشست کا انعقاد کیا گیا۔
یہ ایک روزہ تربیتی سرگرمی سوشل ویلفیئر اینڈ بیت المال ڈیپارٹمنٹ حکومتِ پنجاب کے زیرِ اہتمام، سوشل ویلفیئر ٹریننگ انسٹی ٹیوٹ، کمیونٹی ورلڈ سروس ایشیا اور دیگر متعلقہ اداروں کے اشتراک سے منعقد کی گئی۔ نشست میں چائلڈ پروٹیکشن کنسلٹنٹ و ٹرینر سید سلیم عباس، سوشل ویلفیئر ٹریننگ انسٹی ٹیوٹ کی لیکچرار عابدہ کاشف، آمنہ بٹ اور اسسٹنٹ ڈائریکٹر فی میل چلڈرن ہوم اسماء احمد نے شرکت کی۔
اس نشست کا بنیادی مقصد بچوں کے حقوق، تحفظ، سلامتی اور انہیں ہر قسم کے تشدد، بدسلوکی، غفلت اور استحصال سے محفوظ رکھنے کے حوالے سے شعور بیدار کرنا تھا۔ اس موقع پر طالبات کو دوستانہ انداز میں ان کے بنیادی حقوق، ذاتی تحفظ، محفوظ رویوں اور کسی بھی ناخوشگوار صورتحال میں قابلِ اعتماد افراد یا اداروں سے رابطہ کرنے سے متعلق رہنمائی فراہم کی گئی۔
چائلڈ پروٹیکشن ٹرینر سید سلیم عباس نے اپنے خطاب میں کہا کہ بچوں کا تحفظ کسی ایک ادارے کی نہیں بلکہ والدین، اساتذہ اور پوری سوسائٹی کی مشترکہ ذمہ داری ہے۔ بچوں کو ایسا ماحول فراہم کیا جانا چاہیے جہاں وہ بلا خوف و خطر اپنی بات بیان کر سکیں اور اپنی صلاحیتوں کو پروان چڑھا سکیں۔
لیکچرار عابدہ کاشف اور آمنہ بٹ نے گفتگو کرتے ہوئے کہا کہ ہر بچے کو عزت، تعلیم اور محفوظ مستقبل کا حق حاصل ہے۔ بچوں کی بات سننا، ان کے احساسات کو سمجھنا اور کسی بھی پریشانی میں خاموش نہ رہتے ہوئے مدد حاصل کرنا انتہائی ضروری ہے تاکہ ان کی ذہنی و جسمانی نشوونما بہتر ہو سکے۔
اسسٹنٹ ڈائریکٹر چلڈرن ہوم اسماء احمد نے بتایا کہ ادارے میں مقیم بچوں کی فلاح و بہبود، تعلیم، تربیت اور تحفظ ان کی اولین ترجیح ہے۔
تربیتی نشست کے اختتام پر طالبات نے موضوع سے متعلق سوالات کیے جن کے مقررین نے تفصیلی جوابات دیے۔ بعد ازاں طالبات میں تحائف بھی تقسیم کیے گئے جس پر بچوں نے خوشی کا اظہار کرتے ہوئے مہمانوں کا شکریہ ادا کیا۔