شاہوالا جنوبی: راجہ نورالہی عاطف
بزمِ سعد شاہوالا جنوبی کے زیرِ اہتمام آٹھواں سالانہ آل پاکستان پنجابی، سرائیکی اور اردو محفلِ مشاعرہ 2 اکتوبر بروز جمعہ اور ہفتہ کی درمیانی شب رات 8 بجے شاہوالا جنوبی میں منعقد ہوگا۔ یہ بات مشاعرہ کے منتظمِ اعلیٰ ملک سلیم سعد واگھرہ نے میڈیا سے خصوصی گفتگو کرتے ہوئے بتائی۔
انہوں نے کہا کہ اس شاندار ادبی و ثقافتی تقریب کے انتظامات کو حتمی شکل دے دی گئی ہے، جس میں ملک بھر سے معروف شعرائے کرام، ادبی شخصیات اور اہلِ ذوق بھرپور شرکت کریں گے۔ مشاعرہ کے چیف آرگنائزر لٹریری اینڈ سپورٹس ایکٹیویٹیز ڈسٹرکٹ خوشاب ملک عبدالغفور آصف بوڑانہ بطور مہمانِ خصوصی شرکت کریں گے۔
ملک سلیم سعد واگھرہ نے بتایا کہ محفلِ مشاعرہ میں مختلف علاقوں سے تعلق رکھنے والے متعدد نامور شعراء اپنے اپنے کلام پیش کریں گے اور اپنی خوبصورت شاعری کے ذریعے شرکائے محفل کو محظوظ کریں گے۔ پنجابی، سرائیکی اور اردو زبانوں کے حسین امتزاج سے سجی یہ ادبی شام شعر و سخن سے وابستہ افراد کے لیے خصوصی کشش کا باعث ہوگی۔
انہوں نے کہا کہ شاہوالا جنوبی میں منعقد ہونے والی اس سالانہ محفلِ مشاعرہ نے گزشتہ برسوں کے دوران ادبی حلقوں میں اپنی منفرد شناخت قائم کی ہے۔ ملک بھر سے شعراء اور ادبی شخصیات کی شرکت کے باعث اس بار بھی ادبی حلقوں میں خاصا جوش و خروش پایا جا رہا ہے، جبکہ شاعری سے محبت رکھنے والے افراد کی بڑی تعداد کی شرکت متوقع ہے۔
منتظمِ اعلیٰ نے کہا کہ ادب، شاعری اور مثبت فکری سرگرمیوں کا فروغ معاشرے کی بنیادی ضرورت ہے۔ ایسی محافل نہ صرف شعر و ادب کی ترویج کا ذریعہ بنتی ہیں بلکہ نئی نسل کو اپنی زبان، ثقافت اور ادبی روایات سے جوڑنے میں بھی اہم کردار ادا کرتی ہیں۔ محفلِ مشاعرہ میں شعراء کے کلام کے ذریعے محبت، امن، بھائی چارے اور مثبت سوچ کے پیغام کو اجاگر کیا جائے گا۔
انہوں نے اہلِ ادب، شعر و شاعری سے دلچسپی رکھنے والے افراد اور تمام اہلِ ذوق کو اس خوبصورت ادبی محفل میں شرکت کی دعوت دیتے ہوئے کہا کہ شاہوالا جنوبی کی یہ بزمِ سخن شعر و ادب کے فروغ اور اہلِ ذوق کے لیے ایک یادگار شام ثابت ہوگی۔