سیالکوٹ (سلیم احمد اعوان شیخو)
سوشل سکیورٹی ہسپتال ڈسکہ روڈ سیالکوٹ کی ری ویمپنگ اور اپ گریڈیشن کے منصوبے کے افتتاح پر
خواجہ محمد آصف نے خطاب کرتے ہوئے کہا کہ سوشل سکیورٹی ہسپتال کی اپ گریڈیشن سیالکوٹ کے فیکٹری ورکرز اور ان کے خاندانوں کے لئے انتہائی اہم اقدام ہے۔ سیالکوٹ میں لاکھوں لوگوں کا روزگار فیکٹریوں اور صنعتی شعبے سے وابستہ ہے اس لئے مزدوروں کو معیاری طبی سہولیات کی فراہمی ہماری بنیادی ذمہ داری ہے۔
سیالکوٹ پاکستان کا واحد شہر ہے جو عالمی سطح پر اپنی شناخت رکھتا ہے جبکہ یہاں کی صنعت ملکی معیشت میں اہم کردار ادا کر رہی ہے اس لئے صنعتی کارکنوں کو صحت سمیت بنیادی سہولیات کی فراہمی ناگزیر ہے۔ پنجاب میں کرپشن کے خلاف منظم طریقے سے اقدامات کا آغاز ہوا ہے بلکہ کرپشن ایسا ناسور ہے جو پورے ملک میں سرایت کر چکا ہے اور اس کے خلاف جنگ میں کردار ادا کرنا ہم سب کا اولین فرض ہے۔ پمز میں جو کچھ ہوا ہے وہ صرف اور صرف کرپشن کی وجہ سے ہوا کیونکہ وہاں لوگوں نے مال کمانے کو مقصد بنا لیا تھا اور کرپشن کا ایک گٹھ جوڑ قائم ہو چکا تھا۔ انسانی جانوں کو بچانا مقصد ہونا چاہئیے تھا مگر وہاں کرپشن اور جیبیں بھرنے کو ترجیح دی گئی اور پمز میں پیش آنے والے واقعات ہمارے لئے خطرے کی گھنٹی ہیں۔ پنجاب میں گزشتہ اڑھائی سال کے دوران صحت کے شعبے میں نمایاں بہتری آئی ہے جبکہ حکومت صحت کی سہولیات عوام کی دہلیز تک پہنچانے کے لیے اقدامات کر رہی ہے۔
گوجرانوالہ میں کینسر کے علاج کی سہولت میں اضافہ کرنے کا منصوبہ ہے جبکہ سیالکوٹ میں 500 بستروں پر مشتمل ڈسٹرکٹ ہسپتال میں بھی اضافہ ہو رہا ہے یہاں ہارٹ سرجری کی سہولت بھی فراہم کی جائے گی۔انھوں نے سیالکوٹ کے لئے وفاقی اور پنجاب حکومت کی جانب سے فنڈز کی فراہمی پر اظہار تشکر کرتے ہوئے کہا کہ ایسے منصوبے عوام کو بہتر اور معیاری طبی سہولیات فراہم کرنے میں اہم کردار ادا کریں گے۔