شیخوپورہ(اسامہ طفیل سے)
ڈکیتی، چوری اور رہزنی کی وارداتوں کا سلسلہ بدستور جاری ہے، نواحی علاقے بامیا چٹا کے قریب موٹر سائیکل سوار ڈاکوؤں نے اسلحہ کے زور پر تین شہریوں کو روک کر نقدی اور موبائل فونز سے محروم کردیا، دورانِ واردات مزاحمت پر ڈاکوؤں نے فائرنگ کردی جس کے نتیجہ میں ماجد عرف شرن نامی شہری شدید زخمی ہوگیا۔زخمی شہری کو فوری طور پر قریبی تحصیل اسپتال منتقل کیا گیا، جہاں تشویشناک حالت کے باعث اسے لاہور ریفر کردیا گیا۔ واقعہ کے بعد پولیس نے ملزمان کی گرفتاری کے لیے کارروائی شروع کردی جبکہ مختلف پہلوؤں سے تحقیقات کرتے ہوئے شواہد اکٹھے کیے جارہے ہیں۔دوسری واردات شہر کے پوش علاقے سول لائن میں پیش آئی، جہاں نجی کیمبرج ایلیٹ کلب کے باہر سے نامعلوم چور طالبعلم کی موٹر سائیکل لے اڑے۔ بتایا گیا ہے کہ محنت کش محمد رفیق نے اپنی موٹر سائیکل اپنے بیٹے عبدالریحان کو دی تھی، جو کلب کے باہر کھڑی کرنے کے بعد چوری ہوگئی۔ تھانہ اے ڈویژن کے عقب میں موٹر سائیکل چوری ہونے کے واقعہ نے پولیس کے حفاظتی و انتظامی اقدامات پر بھی سوالیہ نشان کھڑا کردیا ہے۔طالبعلم کی تحریری درخواست پر پولیس نے نامعلوم چور کے خلاف مقدمہ درج کرلیا ہے، تاہم تاحال چوری شدہ موٹر سائیکل برآمد نہیں ہوسکی۔ شیخوپورہ میں ڈکیتی کی وارداتوں کے دوران شہریوں پر فائرنگ کے بڑھتے ہوئے واقعات سے شہریوں میں تشویش پائی جارہی ہے، جبکہ جرائم پیشہ عناصر کے خلاف پولیس کارروائیوں کو مزید مؤثر بنانے کا مطالبہ بھی زور پکڑ رہا ہے۔