نواب شاہ (بیورو رپورٹ نفیس آرائیں)
سندھی ایسوسی ایشن آف نارتھ امریکہ (سانا) کے مرکزی صدر ڈاکٹر مقبول ہالیپوٹو اور جوائنٹ سیکریٹری علی خاصخیلی نے شہید بینظیر بھٹو یونیورسٹی شہید بینظیرآباد کا دورہ کیا، جہاں وائس چانسلر پروفیسر ڈاکٹر مدد علی شاہ، اساتذہ، انتظامی افسران اور طلبہ سے ملاقات کی۔سانا کے وفد نے یونیورسٹی کے مختلف شعبہ جات کا معائنہ کیا، جبکہ ملٹی پرپز ہال میں طلبہ و طالبات کی جانب سے معزز مہمانوں کے اعزاز میں استقبالیہ تقریب کا انعقاد کیا گیا۔ تقریب میں طلبہ کے لیے اسکالرشپس کی فراہمی اور بین الاقوامی تعلیمی اداروں میں داخلوں کے مواقع کے حوالے سے مفاہمتی یادداشتوں
(MoUs)
پر دستخط کیے گئے۔
اس موقع پر ڈاکٹر مقبول ہالیپوٹو نے کہا کہ وائس چانسلر پروفیسر ڈاکٹر مدد علی شاہ کی قیادت میں یونیورسٹی میں نوجوان نسل کو معیاری تعلیم کی فراہمی کے لیے مؤثر اقدامات قابلِ تحسین ہیں۔ تعلیم ہی نوجوانوں کے روشن مستقبل اور سندھ کی ترقی کی بنیادی ضمانت ہے، جبکہ عالمی سطح پر اعلیٰ تعلیم اور تحقیق کے مواقع فراہم کرنا وقت کی اہم ضرورت ہے۔
وائس چانسلر پروفیسر ڈاکٹر مدد علی شاہ نے کہا کہ سانا سندھ سے دور رہتے ہوئے بھی یہاں کے نوجوانوں کی تعلیم اور مستقبل کے لیے قابلِ قدر کردار ادا کر رہی ہے۔ یونیورسٹی کا عزم ہے کہ طلبہ کو معیاری تعلیم کے ساتھ عالمی تعلیمی مواقع تک رسائی فراہم کی جائے۔ اسکالرشپس اور بین الاقوامی اداروں سے تعاون کے معاہدے اسی سلسلے کی اہم پیش رفت ہیں۔