لاہور:صوبائی دارالحکومت لاہور کے علاقے بادامی باغ میں تعلیمی ناکامی کے صدمے نے ایک ہنستا کھیلتا گھر اجاڑ دیا۔ نویں جماعت کی 16 سالہ طالبہ نور فاطمہ امتحانات میں فیل ہونے کا غم برداشت نہ کر سکی اور گلے میں پھندا ڈال کر اپنی زندگی کا خاتمہ کر دیا۔ اس دل دہلا دینے والے واقعے نے والدین اور اہل خانہ کو شدید صدمے سے دوچار کر دیا ہے۔
ایدھی ترجمان کی جانب سے فراہم کردہ معلومات کے مطابق افسوسناک واقعہ اس وقت پیش آیا جب نور فاطمہ کا تعلیمی رزلٹ سامنے آیا۔ امتحانات میں کامیابی نہ ملنے پر کم عمر طالبہ نے انتہائی قدم اٹھاتے ہوئے خود کو پھندے سے لٹکا لیا۔ گھر والوں نے جب اسے اس حالت میں دیکھا تو فوری طور پر امدادی اداروں کو اطلاع دی۔
ایدھی کی ریسکیو ٹیم نے موقع پر پہنچ کر نور فاطمہ کو فوری طور پر ایدھی ایمبولینس کے ذریعے کوٹ خواجہ سعید ہسپتال منتقل کیا، تاہم ہسپتال کے ڈاکٹروں نے معائنے کے بعد تصدیق کی کہ وہ ہسپتال پہنچنے سے قبل ہی جان کی بازی ہار چکی تھیں۔ پولیس نے اسپتال سے متوفیہ کی لاش کو تحویل میں لے کر مردہ خانے منتقل کر دیا ہے اور واقعے کے تمام پہلوؤں سے باقاعدہ تفتیش شروع کر دی ہے۔
