ڈی ایچ کیو ہسپتال  میں ناگہانی صورتحال سے نمٹنے کے لیے موک ایکسرسائز

چنیوٹ (فرحان بلال سے)

کسی بھی ناگہانی صورتحال اور ہنگامی حالات سے مؤثر انداز میں نمٹنے کے لیے ضلعی انتظامیہ کے زیر اہتمام ڈی ایچ کیو ہسپتال چنیوٹ میں موک ایکسرسائز کا انعقاد کیا گیا، جس میں ریسکیو 1122 کے جوانوں، ڈاکٹرز اور ہسپتال کے دیگر عملہ نے حصہ لیا۔ موک ایکسرسائز کے دوران ہسپتال میں اچانک آگ لگنے کی فرضی صورتحال پیدا کرکے آگ بجھانے اور زخمیوں کو بروقت ریسکیو کرنے کا عملی مظاہرہ کیا گیا۔ڈپٹی کمشنر چنیوٹ عائشہ رضوان نے موک ایکسرسائز کا جائزہ لیا۔ اس موقع پر سی او ہیلتھ ڈاکٹر احمد خان، ایم ایس ڈی ایچ کیو ہسپتال، ڈسٹرکٹ ایمرجنسی آفیسر ریسکیو 1122 اور دیگر متعلقہ افسران و اہلکار بھی موجود تھے۔موک ایکسرسائز کے دوران ہسپتال کے ڈاکٹرز اور سٹاف نے آگ بجھانے کے آلات کے استعمال اور آگ پر قابو پانے کا عملی مظاہرہ کیا جبکہ ریسکیو 1122 کے جوانوں نے فرضی زخمیوں کو فوری طور پر ریسکیو کرنے، ابتدائی طبی امداد فراہم کرنے اور محفوظ مقام پر منتقل کرنے کی مشق کی۔ ریسکیو ٹیموں نے ہنگامی صورتحال میں باہمی رابطہ، فوری رسپانس اور امدادی کارروائیوں کا بھی عملی مظاہرہ کیا۔اس موقع پر ڈپٹی کمشنر عائشہ رضوان نے کہا کہ موک ایکسرسائز کا مقصد کسی بھی ہنگامی یا ناگہانی صورتحال میں متعلقہ اداروں کی تیاری، رسپانس ٹائم اور باہمی رابطہ کارکردگی کو جانچنا ہے۔ ہسپتالوں میں ایمرجنسی صورتحال سے نمٹنے کے لیے ڈاکٹرز، پیرا میڈیکل سٹاف، ریسکیو 1122 اور دیگر متعلقہ اداروں کا باہمی تعاون انتہائی ضروری ہے۔انہوں نے کہا کہ ہنگامی صورتحال میں چند لمحوں کی بروقت کارروائی قیمتی انسانی جانوں کو محفوظ بنانے میں اہم کردار ادا کرتی ہے، اس لیے تمام متعلقہ اداروں کو ہر وقت مکمل طور پر تیار رہنا چاہیے۔ ضلعی انتظامیہ کی جانب سے ہنگامی حالات سے نمٹنے کے لیے تمام ضروری اقدامات اور مشقوں کا سلسلہ جاری رکھا جائے گا۔ڈپٹی کمشنر نے موک ایکسرسائز میں حصہ لینے والے ریسکیو 1122 کے جوانوں، ڈاکٹرز اور ہسپتال کے عملہ کی کارکردگی کو سراہتے ہوئے ہدایت کی کہ ہسپتال میں فائر سیفٹی آلات کی دستیابی، فعالیت اور ایمرجنسی ایگزٹ سمیت تمام حفاظتی انتظامات کو ہر صورت یقینی بنایا جائے