شہید سب انسپکٹر عدیل عاشق، ہیڈ کانسٹیبل اسد اور کانسٹیبل حارث سلیم کی نمازِ جنازہ ادا، کورکمانڈر اور آئی جی پنجاب سمیت اعلی حکام کی شرکت

    لاہور: فرض کی راہ میں جامِ شہادت نوش کرنے والے سب انسپکٹر عدیل عاشق، ہیڈ کانسٹیبل اسد اور کانسٹیبل حارث سلیم کی نمازِ جنازہ پولیس لائنز قلعہ گجر سنگھ لاہور میں پورے سرکاری اعزاز کے ساتھ ادا کر دی گئی۔
    نمازِ جنازہ میں کور کمانڈر لاہور، صوبائی وزیر خزانہ، چیف سیکرٹری، سیکرٹری داخلہ پنجاب، آئی جی پنجاب، سی سی پی او لاہور اور دیگر عسکری و سول قیادت کے علاوہ قانون نافذ کرنے والے اداروں کے سینئر افسران اور پولیس اہلکاروں نے بڑی تعداد میں شرکت کی۔


    پولیس کے چاق و چوبند دستے نے شہداء کے جسدِ خاکی کو سلامی پیش کی۔ اس موقع پر کور کمانڈر لاہور نے چیف آف آرمی سٹاف اور چیف آف ڈیفنس فورسز کی جانب سے شہداء کے جسدِ خاکی پر پھول چڑھائے۔ وزیر خزانہ، چیف سیکرٹری، ڈی جی رینجرز پنجاب اور آئی جی پنجاب سمیت دیگر اعلیٰ عسکری و سول حکام نے بھی شہداء کی قبروں اور میتوں پر پھول نچھاور کیے اور بلندیِ درجات کے لیے فاتحہ خوانی کی۔
    نمازِ جنازہ کے بعد کور کمانڈر لاہور اور آئی جی پنجاب نے شہداء کے لواحقین سے ملاقات کی، انہیں دلاسہ دیا اور فرض کی راہ میں پیش کی جانے والی اس عظیم قربانی پر خراجِ تحسین پیش کیا۔ اس موقع پر عسکری و پولیس قیادت نے عزم ظاہر کیا کہ شہداء کے خاندانوں کو ہرگز تنہا نہیں چھوڑا جائے گا، اور ان کی بہترین دیکھ بھال اور ویلفیئر کا مکمل خیال رکھا جائے گا۔
    ترجمان پنجاب پولیس کے مطابق، یہ افسوسناک واقعہ گزشتہ شب اس وقت پیش آیا جب ملزمان کی فائرنگ کے نتیجے میں یہ تینوں بہادر اہلکار شہید ہو گئے۔ ملزم ریحان بٹ اپنے بھائی فیضان بٹ (جو 2024 میں سی ٹی ڈی کے ایک مقابلے میں مارا گیا تھا) کی ہلاکت کا بدلہ لینا چاہتا تھا اور اسے اس بات کی شدید رنجش تھی کہ سب انسپکٹر عدیل عاشق نے اس کے بھائی کو مقابلے میں ہلاک کیا تھا۔ ملزم ریحان بٹ اس سے قبل بھی سب انسپکٹر عدیل عاشق کو فون پر دھمکیاں دیتا رہا تھا، اور اس کے خلاف سب انسپکٹر کی مدعیت میں مقدمہ بھی درج تھا۔
    نمازِ جنازہ کی ادائیگی کے بعد شہداء کے جسدِ خاکی کو مکمل پولیس پروٹوکول کے ساتھ ان کے آبائی علاقوں میں روانہ کر دیا گیا، جہاں انہیں پورے اعزاز کے ساتھ سپردِ خاک کیا جائے گا۔

    Related Posts