مہنگے علاج اور کریموں کی چھٹی: ہارورڈ کے ماہر ڈاکٹر نے جھریوں سے بچنے ، جلد کو چمکدار بنانے کا گھریلو نسخہ بتا دیا

نیویارک:مہنگے کاسمیٹکس اور کولیجن انجیکشنز کی بجائے ہارورڈ یونیورسٹی سے فارغ التحصیل معدے اور امراضِ شکم کے ماہر (گیسٹرو اینٹولوجسٹ) ڈاکٹر سوربھ سیٹھی نے ایک نہایت آسان اور کم خرچ عادت بتائی ہے جو چہرے کی دلکشی اور جلد کی تروتازگی میں نمایاں نکھار پیدا کر سکتی ہے۔
ڈاکٹر سوربھ سیٹھی کا کہنا ہے کہ ہر صبح ایک گلاس پانی میں تازہ لیموں کا رس نچوڑ کر پینا بڑھتی ہوئی عمر کے اثرات کو سست کرنے اور جلد کی چمک کو بڑھانے والی سب سے مؤثر روزمرہ کی عادتوں میں سے ایک ہے۔
انہوں نے وضاحت کی کہ لیموں میں وٹامن سی کی وافر مقدار کے علاوہ تقریباً 30 فعال پودوں کے مرکبات (active plant compounds) پائے جاتے ہیں، جو اسے قدرتی اینٹی آکسیڈنٹس کا ایک طاقتور ذریعہ بناتے ہیں۔ غذائیت سے بھرپور تمام فوائد حاصل کرنے کے لیے وہ تازہ اور غیر پروسیس شدہ دیسی لیموں کے استعمال کا مشورہ دیتے ہیں۔
ڈاکٹر سیٹھی کے مطابق یہ سادہ مشروب معدنیات کے جذب ہونے میں بہتری کے اہم میکانزم کے ذریعے جوانی اور تروتازگی برقرار رکھنے میں مدد دیتا ہے۔لیموں میں موجود قدرتی تیزابیت جسم کو آئرن جیسے اہم ترین عناصر کو زیادہ بہتر طریقے سے جذب کرنے میں مدد دیتی ہے۔