اسلام آباد / تہران: وزیر دفاع خواجہ محمد آصف نے معروف امریکی جریدے ’بلومبرگ‘ کو دیے گئے ایک خصوصی انکشاف میں دعویٰ کیا ہے کہ امریکہ اور ایران ایک بار پھر امن معاہدے کے انتہائی قریب پہنچ چکے ہیں، اور معاملات تیزی سے کسی حتمی معاہدے کی طرف بڑھ رہے ہیں۔ دوسری جانب عین اسی نازک ترین موقع پر وفاقی وزیر داخلہ محسن نقوی ہنگامی دورے پر ایرانی دارالحکومت تہران پہنچ چکے ہیں ۔
وزیر دفاع خواجہ آصف نے بلومبرگ نیوز سے گفتگو کرتے ہوئے کہا ایک مرتبہ پھر حالات امن معاہدے یا کسی سمجھوتے کے حق میں بنتے دکھائی دے رہے ہیں۔انہوں نے کہا گزشتہ دو، تین روز کے دوران ملنے والے اشارے یہ ہیں کہ ہم کسی نہ کسی سمجھوتے کے قریب پہنچ چکے ہیں۔
یادرہےپاکستان نے جاری امریکا ایران تنازع کو کم کرنے کے لیے ثالثی کی کوششوں میں فعال کردار ادا کیا ہے۔ یہ تنازع 28 فروری 2026 کو امریکا اور اسرائیل کے حملوں کے بعد شروع ہوا، جس کے جواب میں ایران نے بھی جوابی کارروائیاں کیں۔
ان کوششوں کو چین، سعودی عرب، ترکیہ، مصر اور اقوام متحدہ سمیت مختلف علاقائی اور عالمی شراکت داروں کی جانب سے بڑے پیمانے پر سراہا اور حمایت کی گئی ہے۔
خواجہ آصف کے بیان کے بعد عالمی سطح پر تیل کی قیمتوں میں کمی آئی، برینٹ خام تیل کے مستقبل کے سودوں کی قیمت 21 سینٹ یا 0.24 فیصد کم ہوکر 11:38 جی ایم ٹی تک 87.51 ڈالر فی بیرل ہوگئی۔ امریکی ویسٹ ٹیکساس انٹرمیڈیٹ خام تیل کے مستقبل کے سودوں کی قیمت بھی 4 سینٹ یا 0.05 فیصد کمی سے 82.09 ڈالر فی بیرل رہی۔
امریکا ایران معاہدہ طے ہونے کے قریب، محسن نقوی ہنگامی دورے پر تہران پہنچ گئے!
