خوشاب (راجہ نورالہی عاطف سے)
ڈپٹی کمشنر خوشاب ڈاکٹر جہانزیب حسین لابر نے ڈی سی آفس کمپلیکس کی مختلف برانچز کا اچانک دورہ کیا اور صفائی ستھرائی کے انتظامات، افسران و ملازمین کی حاضری، دفتری ریکارڈ اور سائلین کو فراہم کی جانے والی سہولیات کا تفصیلی جائزہ لیا۔ ڈپٹی ڈائریکٹر ڈویلپمنٹ سہیل سکندر رانجھا بھی اس موقع پر ان کے ہمراہ تھے۔ دورانِ معائنہ متعلقہ برانچز کے سربراہان نے ڈپٹی کمشنر کو دفتری امور، زیرِ التوا معاملات اور سائلین کی درخواستوں و مسائل پر ہونے والی پیش رفت کے بارے میں بریفنگ دی۔ ڈپٹی کمشنر ڈاکٹر جہانزیب حسین لابر نے ہدایت کی کہ ڈی سی آفس کمپلیکس میں آنے والے ہر سائل کو عزت و احترام کے ساتھ سنا جائے اور اس کے مسئلے کے حل کے لیے قانون و ضابطے کے مطابق فوری اور مؤثر کارروائی عمل میں لائی جائے۔ انہوں نے کہا کہ شہریوں کو سرکاری دفاتر سے بروقت اور شفاف انداز میں ریلیف کی فراہمی افسران و ملازمین کی بنیادی ذمہ داری ہے۔ انہوں نے مزید ہدایت کی کہ تمام برانچز، راہداریوں، باغیچوں، واش رومز اور کمپلیکس کے دیگر حصوں میں صفائی ستھرائی کے اعلیٰ معیار کو ہر صورت برقرار رکھا جائے۔ انہوں نے کمپلیکس کی خوبصورتی میں اضافے کے لیے پھول دار پودے لگانے، شجرکاری اور تزئین و آرائش کے مزید اقدامات کرنے کی بھی ہدایت کی۔ ڈپٹی کمشنر نے افسران و ملازمین پر زور دیا کہ وہ اپنی سرکاری ذمہ داریاں قومی فریضہ سمجھ کر پوری دیانت داری، فرض شناسی اور احساسِ ذمہ داری کے ساتھ ادا کریں۔ انہوں نے واضح کیا کہ فرائض کی انجام دہی میں غفلت، کوتاہی یا سائلین کے ساتھ نامناسب رویہ کسی صورت برداشت نہیں کیا جائے گا۔ ڈپٹی کمشنر ڈاکٹر جہانزیب حسین لابر نے ڈی سی آفس کمپلیکس کے مختلف کمروں کا بھی معائنہ کیا اور ہدایت کی کہ دستیاب سرکاری عمارت اور جگہ کو مؤثر انداز میں بروئے کار لاتے ہوئے ان کمروں کو دفتری امور کے لیے قابلِ استعمال بنایا جائے۔