ملک کا مستقبل سڑکوں پر آیا، نوجوانوں کا غصہ جائز ہے، راہل گاندھی

لوک سبھا میں اینٹی پیپر لیک (ترمیمی) بل پر بحث کے دوران اپوزیشن لیڈر راہل گاندھی نے کہا کہ ’’ملک کا مستقبل سڑکوں پر اترنے پر مجبور ہوا اور نوجوانوں کا غصہ بالکل جائز ہے۔‘‘ انہوں نے کہا کہ طلبہ کی تحریک دراصل ملک کے نوجوانوں کے جذبات کی عکاس تھی اور ہر سیاسی جماعت، خصوصاً بی جے پی، کو اس جذبات کا احترام کرنا چاہیے۔ راہل گاندھی نے کہا کہ اگر بی جے پی کے ارکان اپنے ہی بچوں سے پوچھیں تو انہیں معلوم ہوگا کہ طلبہ احتجاج کیوں کر رہے تھے اور نوجوان اس تحریک کی حمایت کیوں کرتے ہیں۔

انہوں نے مزید کہا کہ احتجاج میں شامل طلبہ، خاص طور پر طالبات، سے گفتگو کے بعد انہیں طلبہ کی سوچ کو بہتر انداز میں سمجھنے کا موقع ملا۔ ان کے مطابق طلبہ وہ ہوتے ہیں جو کھلے ذہن اور عاجزی کے ساتھ علم حاصل کرتے ہیں، یہ مانتے ہیں کہ سیکھنے کا عمل مسلسل جاری رہتا ہے اور ہمیشہ نئے علم کی گنجائش موجود رہتی ہے۔