ویب ڈیسک:مشرقِ وسطیٰ میں امریکہ اور ایران کے مابین بڑھتی ہوئی کشیدگی کے اثرات عالمی منڈی پر نمایاں ہونے لگے ہیں۔ خطے میں کشیدہ صورتِ حال کے باعث جمعہ کو تیل کی عالمی قیمتوں میں ایک بار پھر تیزی دیکھی گئی، جس سے سرمایہ کاروں میں سخت تشویش پائی جاتی ہے۔ جبکہ پاکستانی عوام کے سر پر آج اس وقت بجلی گرے گی جب حکومت کی جانب سے ہفتہ وار پٹرولیم مصنوعات کے نرخوں کا اعلان ہوگا، پٹرول پمپس پر گاڑیوں کی قطاریں گذشتہ رات سے لگی ہوئی ہیں۔
عالمی مارکیٹ میں برینٹ خام تیل کی قیمت 1.05 ڈالر کے اضافے کے ساتھ 85.28 ڈالر فی بیرل تک پہنچ گئی ہے، جبکہ امریکی ویسٹ ٹیکساس انٹرمیڈیٹ (WTI) خام تیل بھی 1.03 ڈالر اضافے کے ساتھ 79.98 ڈالر فی بیرل پر فروخت ہو رہا ہے۔ مجموعی طور پر، صرف اس ہفتے کے دوران دونوں عالمی بینچ مارکس کی قیمتوں میں تقریباً 12 فیصد اضافہ ہوا ہے۔ یہ مسلسل تیسرا ہفتہ ہے کہ برینٹ آئل کی قیمتوں میں اضافہ دیکھا جا رہا ہے۔
ملک بھر میں ڈیزل 40 روپے اور پیٹرول 10روپے فی لیٹر مہنگا ہونے کا امکان ہے تاہم قیمتوں میں ہونے والے اس اضافے کو قابو میں رکھنے کے لیے حکومت کی جانب سے پیٹرولیم لیوی میں کمی کا امکان ہے۔
ایران اور امریکا کے درمیان تازہ کشیدگی کے نتیجے میں عالمی منڈی میں تیل کی قیمتوں میں اضافے کے باعث آئندہ 15 روزہ جائزے میں ہائی سپیڈ ڈیزل کی قیمت میں 18 جولائی سے 40 روپے فی لیٹر تک کا بڑا اضافہ متوقع ہے جب کہ پیٹرول کی قیمت میں بھی تقریباً 10 روپے فی لیٹر تک اضافے کا امکان ہے۔
ماہرینِ معیشت کے مطابق، قیمتوں میں اس اچھال کی بنیادی وجہ آبنائے ہرمز کے ذریعے تیل کی سپلائی متاثر ہونے کا خوف ہے۔ اس کے علاوہ، ایران کی جانب سے حوثی تحریک کو بحیرہ احمر کا تجارتی راستہ بند کرنے کے لیے تیار رہنے کی اطلاعات نے تیل کی بین الاقوامی ترسیل کے حوالے سے خدشات کو مزید گہرا کر دیا ہے۔ چونکہ آبنائے ہرمز توانائی کی فراہمی کا ایک اہم ترین راستہ ہے، اس لیے کسی بھی قسم کی رکاوٹ کا مطلب عالمی سطح پر ایندھن کا بحران ہو سکتا ہے۔
اگرچہ گزشتہ سیشن کے دوران قیمتوں میں وقتی گراوٹ آئی تھی، لیکن موجودہ سیاسی صورتِ حال نے ان تمام نقصانات کا ازالہ کر دیا ہے۔ تجزیہ کاروں کا کہنا ہے کہ اگر ایران اور امریکہ کے درمیان جاری کشیدگی کم نہ ہوئی تو تیل کی قیمتیں مزید بلند سطح تک جا سکتی ہیں، جس سے دنیا بھر میں مہنگائی کا ایک نیا طوفان آ سکتا ہے۔
ہرمز کے بعد باب المندب کی بندش کا خدشہ،خام تیل کی قیمتیں بلند ترین سطح پر ، پاکستانی عوام کے سر پر آج بجلی گرے گی
