پرتگال: عالمی فٹبال کے لیجنڈ اور پرتگال کے کپتان کرسٹیانو رونالڈو نے شائقینِ فٹبال کے لیے ایک جذباتی اعلان کرتے ہوئے تصدیق کی ہے کہ 2026 کا فیفا ورلڈ کپ ان کے شاندار بین الاقوامی کیریئر کا آخری عالمی ٹورنامنٹ ہوگا۔
اسپین کے خلاف پری کوارٹر فائنل سے قبل پریس کانفرنس سے خطاب کرتے ہوئے 41 سالہ اسٹار اسٹرائیکر نے کہا کہ وہ اپنے طویل کیریئر کے اس آخری اہم موڑ کو پوری طرح جینا اور اس سے لطف اندوز ہونا چاہتے ہیں۔ انہوں نے کہا، "میں اس سفر کے ہر لمحے سے لطف اٹھانا چاہتا ہوں۔ یہ میرا آخری ورلڈ کپ ہے، تاہم مجھے پوری امید ہے کہ کل میرا آخری میچ نہیں ہوگا، ہم مزید آگے بڑھیں گے۔”
Whatever happens today, I love you Cristiano.
Thank you for all the memories. https://t.co/vNppyw08O5— Odiwomma (@onesopuruchi) July 6, 2026
پانچ بار بیلن ڈی اور ایوارڈ جیتنے والے رونالڈو کا ماننا ہے کہ ان کی کامیابی کا پیمانہ صرف ورلڈ کپ کی ٹرافی نہیں ہے۔ انہوں نے کہا کہ گزشتہ دو دہائیوں سے زائد عرصے پر محیط اپنے سفر میں انہوں نے فٹبال کو اپنی "ایک ہزار فیصد” توانائی دی ہے۔ انہوں نے مزید کہا کہ "مجھے اپنے ضمیر کا اطمینان ہے کہ میں نے کھیل کے لیے اپنی پوری کوشش کی ہے، اور میں اسی تسکین کے ساتھ میدان کو الوداع کہوں گا۔”
رونالڈو کے اس اعلان نے پوری دنیا کے فٹبال شائقین کو جذباتی کر دیا ہے۔ دنیا بھر میں ان کے مداحوں کا ماننا ہے کہ رونالڈو جیسے کھلاڑی صدیوں میں پیدا ہوتے ہیں، اور ان کا بین الاقوامی فٹبال سے کنارہ کش ہونا کھیل کی دنیا کے ایک سنہری دور کے اختتام کے مترادف ہوگا۔
کرسٹیانو رونالڈو اب اپنے کیریئر کے اس آخری مشن میں ٹرافی کو اٹھانے کے عزم کے ساتھ میدان میں اتریں گے، تاکہ وہ اپنے بین الاقوامی سفر کو یادگار انداز میں مکمل کر سکیں۔