اسٹاک ہوم : سویڈن کی ایک عدالت نے امریکی ٹیک جائنٹ ‘گوگل’ کو مسابقتی قوانین کی خلاف ورزی کرنے پر ‘پرائس رنر’ (PriceRunner) نامی کمپنی کو تقریباً 14.3 ارب سویڈش کرونز (تقریباً 1.5 ارب امریکی ڈالر) بطور ہرجانہ ادا کرنے کا حکم دیا ہے۔ یہ سویڈن کی عدالتی تاریخ میں کسی بھی مسابقتی کیس (Competition Case) میں دیا جانے والا سب سے بڑا ہرجانہ ہے۔
پرائس رنر، جو کہ ادائیگیوں کے معروف پلیٹ فارم ‘کلارنا’ (Klarna) کی ملکیت ہے، نے 2022 میں گوگل کے خلاف مقدمہ دائر کیا تھا۔ کمپنی کا الزام تھا کہ گوگل نے اپنے سرچ انجن کے نتائج میں ہیرا پھیری کرکے اپنی شاپنگ سروس کو غیر منصفانہ برتری دی، جس سے یورپی حریفوں کو بھاری نقصان اٹھانا پڑا۔ پرائس رنر نے برطانیہ میں 2008 سے، اور سویڈن و ڈنمارک میں 2013 سے ہونے والے اپنے منافع کے نقصان کا معاوضہ طلب کیا تھا۔
عدالت کی اہلکار لنڈا کلبرگ نے فیصلے پر تبصرہ کرتے ہوئے کہا کہ "اگرچہ پرائس رنر اپنے تمام مطالبات حاصل کرنے میں کامیاب نہیں ہوئی، لیکن یہ اب تک کا سب سے بڑا ہرجانہ ہے جو سویڈن کی کسی عدالت نے مسابقتی کیس میں دیا ہے۔” واضح رہے کہ پرائس رنر نے مجموعی طور پر تقریباً 78 ارب کرونز کا ہرجانہ طلب کیا تھا۔
گوگل کے ترجمان نے عدالت کے اس فیصلے سے اختلاف کرتے ہوئے کہا ہے کہ کمپنی 2017 کے بعد سے اپنے شاپنگ اشتہارات میں ضروری تبدیلیاں لا چکی ہے، جو کہ مؤثر طریقے سے کام کر رہی ہیں۔ ترجمان نے کہا کہ: "ہم اس فیصلے سے متفق نہیں ہیں، ہم اس کا جائزہ لے رہے ہیں اور اپنے قانونی آپشنز پر غور کریں گے،” جس سے اشارہ ملتا ہے کہ گوگل اس فیصلے کے خلاف اپیل کر سکتا ہے۔
یہ فیصلہ ایسے وقت میں آیا ہے جب یورپ میں امریکی بڑی ٹیکنالوجی کمپنیوں (Big Tech) پر کڑی نظر رکھی جا رہی ہے۔ اس سے قبل 2017 میں بھی یورپی یونین نے گوگل پر 2.42 ارب یورو کا بھاری جرمانہ عائد کیا تھا، جس کے خلاف گوگل کی اپیل حال ہی میں مسترد ہو چکی ہے۔
عدالتی فیصلے کے بعد امریکی اسٹاک مارکیٹ میں الفابیٹ (گوگل کی پیرنٹ کمپنی) کے شیئرز میں معمولی کمی دیکھی گئی، جبکہ دوسری جانب ‘کلارنا’ کے حصص کی قیمت میں تقریباً 7.5 فیصد اضافہ ریکارڈ کیا گیا۔
