سکیورٹی خدشات:مشہور بین الاقوامی پالیسی کانفرنس "والدائی ڈسکشن کلب”کا مقام  تبدیل 

  روسی صدر ولادیمیر پوتن کی صدارتی سیکیورٹی سروس کے مطالبے پر مشہور بین الاقوامی پالیسی کانفرنس "والدائی ڈسکشن کلب” (Valdai Discussion Club) کا مقام سوچی سے تبدیل کر کے ماسکو منتقل کر دیا گیا ہے۔ یوکرین کے طویل فاصلے تک مار کرنے والے ڈرونز کی جانب سے سوچی کے ساحلی علاقوں، تیل کی تنصیبات اور ہوائی اڈے کے قریب حملوں میں اضافے کے باعث یہ سیکیورٹی فیصلہ کیا گیا۔

روس نے ستمبر کے وسط تک کیف اور یوکرین کے دیگر بڑے شہروں کی طبی اور لاجسٹکس تنصیبات، ڈسٹری بیوشن سینٹرز اور بنیادی ڈھانچے پر ڈرون اور میزائل حملوں کا سلسلہ تیز کر دیا ہے۔   امریکی نمائندوں اور مختلف عالمی وفود کی جانب سے ماسکو اور کیف کا دورہ کر کے فائر بندی اور امن مذاکرات پر بات چیت کی کوششیں جاری ہیں۔ دوسری جانب یورپی یونین اور نیٹو کے ممالک نے روس کے اقتصادی اور عسکری دباؤ کے جواب میں یوکرین کی امداد اور اپنی سیکیورٹی صف بندی کو مزید سخت کر دیا ہے۔