ملتان (ڈویژن بیورو چیف ملک جابر عباس)
ڈی پی او لودھراں کیپٹن (ر) علی بن طارق نے تھانہ گیلےوال کے علاقہ اڈا شہنال میں بااثر شخص اور اس کے بیٹوں کی جانب سے بلال اور اس کے بیٹے دھیان بلال پر مبینہ تشدد کے واقعے کا سخت نوٹس لیتے ہوئے فوری قانونی کارروائی کی ہدایت جاری کر دی ہے۔پولیس کے مطابق متاثرہ خاندان کی درخواست پر مقدمہ درج کر لیا گیا ہے اور واقعے میں ملوث تمام ملزمان کی گرفتاری کے لیے مختلف مقامات پر چھاپے مارے جا رہے ہیں۔ اس حوالے سے ایس ایچ او پیراں ڈتہ نے بتایا کہ پولیس ٹیمیں مسلسل کارروائی میں مصروف ہیں اور ملزمان کو بہت جلد گرفتار کر کے قانون کے کٹہرے میں لایا جائے گا۔ڈی پی او لودھراں کا کہنا ہے کہ ضلع بھر میں قانون کی بالادستی کو ہر صورت یقینی بنایا جائے گا اور کسی بھی بااثر شخصیت کو قانون سے بالاتر نہیں سمجھا جائے گا۔ شہریوں کے جان و مال کے تحفظ اور انصاف کی فراہمی پولیس کی اولین ترجیح ہے، جبکہ تشدد، دھونس اور طاقت کے ناجائز استعمال کو کسی صورت برداشت نہیں کیا جائے گا۔انہوں نے متعلقہ افسران کو ہدایت کی ہے کہ واقعے کی شفاف تحقیقات کو یقینی بنایا جائے اور متاثرین کو ہر ممکن قانونی تحفظ فراہم کیا جائے۔ پولیس حکام نے اس عزم کا اعادہ کیا ہے کہ تمام شواہد کی روشنی میں کارروائی مکمل کر کے ذمہ داران کو قانون کے مطابق سزا دلوانے کے لیے ہر ممکن اقدامات کیے جائیں گے۔