ممبئی: بھارتی ٹیلی ویژن انڈسٹری میں ابھرتی ہوئی اداکارہ سنچیتا اوگلے کی المناک موت نے شوبز کے حلقوں میں کھلبلی مچا دی ہے۔ اگرچہ ان کی خودکشی کی حتمی وجہ تاحال سرکاری طور پر واضح نہیں ہے، تاہم اداکارہ کے قریبی دوستوں اور اہل خانہ نے انکشاف کیا ہے کہ وہ طویل عرصے سے شدید ذہنی دباؤ اور ہراسانی کا شکار تھیں۔
اجول شرما کون ہیں اور الزامات کیا ہیں؟
تحقیقات اور قریبی ذرائع کے مطابق، اداکارہ کے سیریل ’ساجن گھر‘ کے ساتھی اداکار اجول شرما پر سنچیتا کو ذہنی طور پر ہراساں کرنے، تذلیل کرنے اور دھمکیاں دینے کے سنگین الزامات عائد کیے گئے ہیں۔ اندراکشی کنجیلال اور کوشیکی راٹھور نامی اداکارہ کی دوستوں نے دعویٰ کیا ہے کہ اجول نے سنچیتا سے رقم ادھار لی تھی اور جب رقم واپسی کا مطالبہ کیا گیا تو شرما نے بدتمیزی اور جان سے مارنے کی دھمکیاں دینا شروع کر دیں۔
کوشیکی راٹھور کا مزید کہنا ہے کہ اجول شو کے سیٹ پر سنچیتا کو ان کے رنگ روپ پر نازیبا جملے کس کر ذہنی اذیت پہنچاتے تھے، جس سے ان کی خود اعتمادی بری طرح مجروح ہوئی تھی۔ مبینہ طور پر سنچیتا نے یہ معاملہ متعلقہ حکام کے سامنے بھی اٹھایا تھا، لیکن کوئی شنوائی نہ ہونے پر انہوں نے شو چھوڑنے کا فیصلہ کیا تھا۔
سنچیتا کے والد مچیندر اوگلے نے افسوس کا اظہار کرتے ہوئے بتایا کہ ان کی بیٹی گزشتہ کچھ عرصے سے شدید ذہنی تناؤ کا شکار تھی، لیکن وہ اپنی پریشانیوں کو مکمل طور پر ظاہر نہیں کرتی تھی۔ انہوں نے تسلیم کیا کہ ان کی بیٹی بیرونی عوامل اور مالی مسائل سے لڑ رہی تھی، جن سے نمٹنے کی کوششوں کے باوجود وہ اپنے آپ کو تنہا محسوس کرتی رہی۔
رپورٹس کے مطابق، سنچیتا پہلے بھی خودکشی کے خیالات کا اظہار کر چکی تھیں، جو ان کی گہری جذباتی کشمکش کا اشارہ تھا۔ دوستوں کا کہنا ہے کہ وہ اپنے کام سے بھی لطف اندوز ہونا چھوڑ چکی تھیں اور انڈسٹری کے دباؤ کے ساتھ ساتھ اجول شرما کی جانب سے مسلسل تذلیل نے انہیں اس انتہا تک پہنچا دیا۔
یاد رہے کہ اجول شرما نے ان الزامات پر تاحال کوئی باضابطہ ردِعمل نہیں دیا ہے، تاہم سنچیتا کے دوستوں کی جانب سے شیئر کیے گئے گفتگو کے اسکرین شاٹس نے معاملے کو مزید پیچیدہ بنا دیا ہے۔ پولیس اس پہلو سے بھی تفتیش کر رہی ہے کہ آیا ان الزامات کی بنیاد پر کسی قانونی کارروائی کا آغاز کیا جا سکتا ہے یا نہیں۔