جھڈو (رپورٹ: قیصر راجہ راجپوت)
محرم الحرام کا چاند نظر آتے ہی جھڈو اور گرد و نواح کے علاقوں میں عزاداری کا سلسلہ شروع ہو گیا۔ مختلف امام بارگاہوں اور عزاخانوں میں علمِ پاک، ذوالجناح اور شہدائے کربلا کے تبرکات کی زیارت کے لیے عقیدت مندوں کی بڑی تعداد نے شرکت کی۔اس موقع پر مجالسِ عزا کا انعقاد کیا گیا جہاں علماء کرام اور ذاکرین نے واقعۂ کربلا، حضرت امام حسینؓ اور ان کے جانثار ساتھیوں کی عظیم قربانیوں پر روشنی ڈالی۔ مقررین نے کہا کہ کربلا حق و باطل کی معرکہ آرائی کا عظیم درس ہے جو قیامت تک انسانیت کے لیے مشعلِ راہ رہے گا۔جھڈو اور ملحقہ علاقوں کی امام بارگاہوں میں عزاداروں نے علمِ مبارک کی زیارت کی اور شہدائے کربلا کو خراجِ عقیدت پیش کیا۔ اس موقع پر سیکیورٹی کے خصوصی انتظامات بھی کیے گئے جبکہ مختلف سماجی و مذہبی تنظیموں کی جانب سے عزاداروں کے لیے سبیلوں اور دیگر سہولیات کا انتظام کیا گیا۔محرم الحرام کے آغاز کے ساتھ ہی شہر بھر میں سوگ کی فضا قائم ہو گئی ہے اور آئندہ دنوں میں مجالس اور جلوسوں کا سلسلہ بھی جاری رہے گا۔ عوام کی جانب سے حضرت امام حسینؓ اور شہدائے کربلا کی لازوال قربانیوں کو زبردست خراجِ تحسین پیش کیا جا رہا ہے۔