اسلام آباد: وزیراعظم محمد شہباز شریف نے عالمی منڈی میں تیل کی قیمتوں میں کمی اور معاشی بہتری کے ثمرات براہِ راست عوام تک پہنچاتے ہوئے پیٹرولیم مصنوعات کی قیمتوں میں ریکارڈ کمی کا اعلان کر دیا ہے۔
وزیراعظم نے قوم سے خطاب اور جاری کردہ اعلامیے میں بتایا کہ پیٹرول کی قیمت میں 74 روپے جبکہ ڈیزل کی قیمت میں 67 روپے فی لیٹر کمی کی جا رہی ہے۔ اس فیصلے کے بعد پیٹرول کی نئی قیمت 373 روپے سے کم ہو کر 299 روپے، جبکہ ڈیزل کی قیمت 378 روپے سے کم ہو کر 311 روپے فی لیٹر ہو گئی ہے۔
وزیراعظم شہباز شریف نے کہا کہ حکومت نے مشکل معاشی حالات کے باوجود عوام کو ریلیف فراہم کرنے کا جو وعدہ کیا تھا، اسے عملی جامہ پہنا دیا گیا ہے۔ انہوں نے عوام کے صبر و تحمل کو خراجِ تحسین پیش کرتے ہوئے کہا کہ ملک پر آنے والے بحران کے دوران وفاقی حکومت نے ترقیاتی اخراجات میں کٹوتی اور سخت کفایت شعاری کے ذریعے 129 ارب روپے کی بچت کی، تاکہ ایندھن کی بڑھتی ہوئی قیمتوں کے اثرات کو عوام تک پہنچنے سے روکا جا سکے۔
وزیراعظم نے فخریہ انداز میں کہا کہ خطے میں معاشی دباؤ کے باوجود پاکستان میں نہ تو توانائی کا بحران پیدا ہوا اور نہ ہی ایندھن کی قلت کی وجہ سے عوام کو پیٹرول پمپس پر قطاروں کا سامنا کرنا پڑا۔ انہوں نے مزید کہا کہ وفاق اور صوبوں کے باہمی تعاون سے معیشت کو مستحکم رکھا گیا اور عالمی مہنگائی کے دباؤ کو برداشت کرتے ہوئے عوام کو ہر ممکن سہولت فراہم کی گئی۔
وزیراعظم شہباز شریف نے واضح کیا کہ یہ سلسلہ یہیں نہیں رکے گا؛ عالمی منڈی میں تیل کی قیمتوں میں جتنی کمی آئے گی، اس کا مکمل فائدہ عوام کو منتقل کیا جائے گا۔ انہوں نے اس عزم کا اظہار کیا کہ حکومت مہنگائی میں مزید کمی لانے اور کم آمدنی والے طبقات کے لیے سبسڈی کے اقدامات جاری رکھے گی تاکہ عام آدمی کی زندگی میں آسانی پیدا ہو سکے۔
شہباز شریف کا وعدہ پورا،مہنگائی کے ستائے عوام کے لیے بڑی کامیابی؛ ایندھن کی قیمتوں میں تاریخی کمی!
