’’آؤ تمہیں آب زمزم پلاؤں‘‘،، رنگ محل میں ایک شخص نے تیزاب پھینک دیا ، چھ زخمی

لاہور:صوبائی دارالحکومت لاہور کے علاقے رنگ محل میں تیزاب گردی کا ایک افسوسناک واقعہ پیش آیا، جہاں ایک شخص نے دکان پر موجود چھ افراد پر تیزاب پھینک دیا۔ ابتدائی اطلاعات کے مطابق چند روز قبل دکانداروں اور مذکورہ شخص کے درمیان تلخ کلامی اور بدتمیزی کا واقعہ پیش آیا تھا، جس کے بعد ملزم نے انتقامی کارروائی کرتے ہوئے یہ ہولناک قدم اٹھایا۔
عینی شاہدین کے مطابق ملزم دکان پر آیا اور وہاں موجود افراد سے کہا کہ وہ انہیں آبِ زمزم پلانا چاہتا ہے۔ اس نے اپنے بیگ سے دو بوتلیں نکالیں جن میں مبینہ طور پر تیزاب موجود تھا اور اچانک دکان پر موجود افراد پر پھینک دیا۔ واقعے کی ویڈیوز بھی سوشل میڈیا پر گردش کر رہی ہیں جن میں ملزم کو تیزاب پھینکتے ہوئے دیکھا جا سکتا ہے۔
ذرائع کے مطابق متاثر ہونے والے چھ افراد میں سے دو سے تین افراد ابتدائی طبی امداد کے بعد اسپتال سے ڈسچارج ہو چکے ہیں، جبکہ دو افراد تاحال زیرِ علاج ہیں۔ دیگر متاثرین کی حالت خطرے سے باہر بتائی جا رہی ہے۔
واقعے کے بعد شہریوں میں شدید خوف و ہراس پایا جا رہا ہے اور عوام کی جانب سے مطالبہ کیا جا رہا ہے کہ تیزاب گردی جیسے سنگین جرائم میں ملوث عناصر کے خلاف سخت ترین قانونی کارروائی عمل میں لائی جائے۔
دوسری جانب رنگ محل پولیس نے بروقت کارروائی کرتے ہوئے ملزم کو گرفتار کر لیا ہے۔ پولیس حکام کے مطابق ملزم کے خلاف مقدمہ درج کر کے مزید قانونی کارروائی کا آغاز کر دیا گیا ہے جبکہ واقعے کے تمام پہلوؤں سے تحقیقات جاری ہیں۔