کوئٹہ چمن پھاٹک دھماکہ: وفاقی و صوبائی قیادت کا ہنگامی اجلاس، دہشتگردوں کو منطقی انجام تک پہنچانے کے عزم کا اظہار

کوئٹہ: (رحمت اللہ بلوچ بیوروچیف )
وفاقی وزیر داخلہ محسن نقوی اور وزیر اعلیٰ بلوچستان میر سرفراز بگٹی کی زیر صدارت خصوصی اجلاس منعقد ہوا جس میں کوئٹہ چمن پھاٹک کے قریب ہونے والے دھماکے کی صورتحال کا جائزہ لیا گیا۔
اجلاس میں آئی جی بلوچستان پولیس نے دھماکے کی ابتدائی رپورٹ پیش کی جبکہ قانون نافذ کرنے والے اداروں کے اعلیٰ افسران بھی شریک ہوئے۔
اجلاس کے شرکاء نے معصوم شہریوں پر بزدلانہ حملے کی شدید مذمت کرتے ہوئے شہداء کے خاندانوں سے دلی ہمدردی اور تعزیت کا اظہار کیا۔
وفاقی وزیر داخلہ محسن نقوی نے کہا کہ وفاقی حکومت دکھ کی اس گھڑی میں بلوچستان حکومت اور عوام کے ساتھ کھڑی ہے۔ انہوں نے کہا کہ درندہ صفت عناصر نے معصوم لوگوں کو نشانہ بنا کر بدترین سفاکیت کا مظاہرہ کیا ہے۔
محسن نقوی کا کہنا تھا کہ شہداء کی عظیم قربانیوں کو ہمیشہ یاد رکھا جائے گا اور دہشتگرد عناصر کو ہر صورت انجام تک پہنچایا جائے گا۔ انہوں نے سکیورٹی اداروں کی قربانیوں اور خدمات کو بھی خراج تحسین پیش کیا۔
وزیراعلیٰ بلوچستان میر سرفراز بگٹی نے کہا کہ وزیر داخلہ محسن نقوی ہر مشکل گھڑی میں بلوچستان کے ساتھ کھڑے رہے ہیں جس پر وہ ان کے شکر گزار ہیں۔ انہوں نے کہا کہ حکومت شہداء کے خون کی مقروض ہے اور شہداء کے خاندانوں کو تنہا نہیں چھوڑا جائے گا۔
میر سرفراز بگٹی نے مزید کہا کہ فتنہ الہندوستان سے وابستہ دہشتگردوں کو منطقی انجام تک پہنچایا جائے گا۔ انہوں نے بتایا کہ زخمیوں کے علاج معالجے کی خود نگرانی کر رہے ہیں تاکہ متاثرہ افراد کو بہترین طبی سہولیات فراہم کی جا سکیں۔