کوئٹہ:(رحمت اللہ بلوچ بیورو چیف)
بلوچستان کے دارالحکومت کوئٹہ میں چمن پھاٹک کے قریب ہونے والے دھماکے کے نتیجے میں کم از کم24افراد ہلاک اور 20 سے زائد زخمی ہوئے ہیں۔ بیورو رپورٹ کی ابتدائی معلومات کے مطابق واقعہ خودکش دھماکہ ہے جائے وقوعہ پر شدید فائرنگ جاری رہی۔ دھماکہ اتنا شدید تھا کہ آواز شہر بھر میں سنی گئی سیکورٹی فورسز اور ریسکیو ٹیمیں جائے وقوعہ کی جانب روانہ ہوگئیں ۔
دھماکے کی وجہ سے ٹرین ریلوے ٹریک سے اتر گئی ہے ۔
جونیئر اسسٹنٹ کالونی،اور شہباز ٹاؤن میں گھروں کے دروازے اور کھڑکیاں اکھڑ گئیں۔دھماکے کے بعد ریلوے ٹریک کے قریب آگ بھڑک اٹھی فائر بریگیڈ ٹیمیں طلب کرلی گئیں۔
معاون خصوصی برائے داخلہ بلوچستان بابر یوسفزئی کا کہنا ہے کہ واقعہ کی معلومات حاصل کررہے ہیں،جیسے ہی مزید تفصیلات ملیں گی میڈیا کو آگاہ کیا جائے گا تمام متعلقہ اداروں کو الرٹ کر دیا گیا ہے عوام سے اپیل ہے وقوعہ جاۓ کے قریب جمع نہیں ہوں.ایک پولیس افسر نے بی بی سی کے نامہ نگار محمد کاظم سے گفتگو میں کم از کم سات ہلاکتوں کی تصدیق کی ہے۔عینی شاہدین کے مطابق دھماکہ اتنا شدید تھا کہ ریلوے ٹریک کے اطراف کھڑی متعدد گاڑیاں بھی تباہ ہو گئیں جبکہ ملحقہ گھروں کو بھی نقصان پہنچا۔فقیر آباد کے رہائشی نصیر احمد نے بتایا کہ ’ٹرین جارہی تھی جس میں مسافر بھی تھے جب دھماکہ ہوا اس دھماکے کی وجہ سے ہمارے گھر تباہ ہو گئے۔‘
اُن کا کہنا تھاُ کہ اتوار کی وجہ سے ہم لوگ سو رہے تھے کہ زوردار دھماکہ ہوا، گھر کے سارے شیشے ٹوٹ گئے دروازے اور کھڑکیاں گر گئیں۔
چمن بھاٹک کے ایک رہائشی عبدالمالک نے بتایا کہ صبح آٹھ بجے کے قریب زوردار دھماکہ ہوا۔جائے وقوعہ سے ایک عینی شاہد عرفان خان نے بتایا کہ دھماکے کی شدت کی وجہ سے ٹرین کی دو بوگیاں الٹ گئی ہیں جن میں آگ بھڑک اٹھنے کی وجہ سے ایک بوگی کو شدید نقصان پہنچا ہے۔
دھماکے کی وجہ سے ٹریک کے ساتھ بعض کاڑیوں کو بھی نقصان پہنچا ہے۔ دھماکہ اتنا شدید تھا کہ اس کی آواز شہر میں دور تک سنائی دی۔
دھماکے کے باعث کوئٹہ شہر کے ہسپتالوں میں ایمرجنسی نافذ کردی گئی ہے۔وفاقی وزیر ریلوے محمد حنیف عباسی نے کوئٹہ میں ہونے والے دھماکے کی شدید مذمت کی ہے۔
ترجمان ریلوے کی جانب سے جاری کیے گئے بیان میں وزیر ریلوے حنیف عباسی کا کہنا تھا کہ کوئٹہ کینٹ سے آنے والی شٹل ٹرین چمن پھاٹک کے قریب دھماکے کی زد میں آئی۔ دھماکے کے نتیجے میں انجن سمیت تین کوچز پٹری سے اتر گئیں جبکہ دو کوچز الٹ گئیں۔
اُن کا کہنا تھا کہ سیکیورٹی فورسز نے فوری طور پر علاقے کو گھیرے میں لے کر ریسکیو آپریشن شروع کر دیا ہے جبکہ امدادی کارروائیوں کے لیے ریسکیو ٹرک اور ریلیف ٹرین جائے وقوعہ پر روانہ کر دی گئی ہیں۔
اُن کا کہنا تھا کہ پاکستان ریلوے کی آپریشنل سرگرمیاں بلا تعطل جاری رہیں گی جبکہ واقعے کی رپورٹ بھی جلد سامنے آ جائے گی۔