قاضی احمد رپورٹ: سائیں بخش لاکھو
قاضی احمد: پاکستان پیپلز پارٹی کی مرکزی لیڈیز ونگ کی رہنما محترمہ فریال ٹالپر کی ہدایات پر پیپلز پارٹی تعلقہ قاضی احمد کی جانب سے تھیلیسیمیا کے مرض میں مبتلا 2800 سے زائد بچوں کی زندگیاں بچانے کے لیے ایک روزہ میگا بلڈ کیمپ قائم کیا گیا، جہاں شدید گرمی کے باوجود پارٹی کارکنان، سول سوسائٹی، سیاسی و سماجی شخصیات اور مریض بچوں کے والدین نے بڑی تعداد میں شرکت کرکے خون کے عطیات دیے۔بلڈ کیمپ کا افتتاح پیپلز پارٹی تعلقہ قاضی احمد کے صدر خالد حسین آرائیں اور تعلقہ جنرل سیکریٹری علی رضا چانڈیو نے کیا۔ اس موقع پر پیپلز پارٹی سٹی صدر غفار جتوئی، مرتضیٰ شاہانی، شہمیر بگھیو، ڈاکٹر قربان لاشاری، حاجی خان لاکو، سردار اعجاز لاکو، ایڈووکیٹ امتیاز چانڈیو، رضا دھاریجو، رئیس ذوالفقار علی راہو، صدام شاہ شیرازی، ممتاز میمن سمیت دیگر رہنماؤں اور کارکنان نے بھی بڑی تعداد میں شرکت کی۔اس موقع پر رہنماؤں نے میڈیا سے گفتگو کرتے ہوئے کہا کہ تھیلیسیمیا جیسے موذی مرض میں مبتلا معصوم بچے ہر ماہ خون کے منتظر رہتے ہیں، تاہم عید کی تعطیلات اور شدید گرمی کے باعث خون کی شدید قلت پیدا ہو جاتی ہے، جس سے کئی بچوں کی زندگیاں خطرے میں پڑ جاتی ہیں۔ انہوں نے کہا کہ اسی انسانی المیے کو مدنظر رکھتے ہوئے میگا بلڈ کیمپ منعقد کیا گیا تاکہ زیادہ سے زیادہ خون جمع کرکے ضرورت مند بچوں تک پہنچایا جا سکے۔