نئی دہلی: سوشل میڈیا پر حکومتی پالیسیوں کے خلاف طنزیہ مہم چلانے والی ڈیجیٹل تنظیم ‘کاکروچ جنتا پارٹی’ (CJP) کو ہندوستان میں شدید رکاوٹوں کا سامنا ہے۔ جمعرات کے روز بھارتی حکام کی جانب سے اس تنظیم کا آفیشل ‘ایکس’ (سابقہ ٹویٹر) اکاؤنٹ بلاک کر دیا گیا، تاہم تنظیم نے فوری طور پر دوبارہ واپسی کرتے ہوئے نیا اکاؤنٹ بنا لیا ہے۔
"کاکروچ کبھی مرتے نہیں”
اکاؤنٹ بلاک ہونے کے کچھ ہی گھنٹوں بعد، تنظیم کے بانی ابھیجیت دپکے نے ‘کاکروچ از بیک’ (Cockroach is Back) کے نام سے نیا ہینڈل متعارف کرا دیا ہے۔ بانی نے اپنی نئی مہم کی ٹیگ لائن "کاکروچ کبھی نہیں مرتے” رکھی ہے۔ دپکے نے میڈیا کو بتایا کہ انہیں اس کارروائی کا پہلے ہی خدشہ تھا کیونکہ اکاؤنٹ کو ہیک کرنے کی کوششیں کی جا رہی تھیں۔ انہوں نے مزید کہا کہ تنظیم اس اقدام کو قانونی چارہ جوئی کے ذریعے چیلنج کرے گی۔
نیا اکاؤنٹ بننے کے چند ہی گھنٹوں میں فالوورز کی تعداد لاکھوں میں پہنچ گئی ہے۔ جمعرات کی شب تک نئے اکاؤنٹ کے فالوورز کی تعداد 91,000 سے تجاوز کر چکی تھی۔ واضح رہے کہ اصل اکاؤنٹ بند ہونے سے پہلے اس کے فالوورز کی تعداد 2 لاکھ سے زائد تھی۔
تنظیم نے اپنے نئے اکاؤنٹ سے حکمران جماعت بی جے پی کے آفیشل اکاؤنٹ (جس کے تقریباً 8.8 ملین فالوورز ہیں) کے ساتھ اپنے اعداد و شمار کا موازنہ کرتے ہوئے طنزیہ انداز میں لکھا کہ "شاید اسی مقبولیت سے خوفزدہ ہو کر ہمیں بلاک کیا گیا ہے۔” دلچسپ بات یہ ہے کہ انسٹاگرام پر ‘کاکروچ جنتا پارٹی’ کی مقبولیت مسلسل بڑھ رہی ہے اور اس کے فالوورز کی تعداد 18 ملین تک پہنچ گئی ہے، جو اب بڑی سیاسی جماعتوں کے آفیشل اکاؤنٹس سے بھی زیادہ ہو چکی ہے۔
‘کاکروچ از بیک’ اکاؤنٹ کے ذریعے تنظیم نے اپنے احتجاج کا سلسلہ وہیں سے شروع کیا ہے جہاں سے وہ رکا تھا۔ تنظیم نے نیٹ یو جی (NEET UG) 2026 پیپر لیک ہونے کے معاملے پر وزیر تعلیم دھرمیندر پردھان سے فوری استعفیٰ کا مطالبہ کیا ہے۔
ابھیجیت دپکے کا ماننا ہے کہ حکومت اس طنزیہ تحریک کی بڑھتی ہوئی مقبولیت سے خوفزدہ ہے، کیونکہ یہ تنظیم روزانہ ہزاروں نئے نوجوانوں کو اپنی طرف متوجہ کر رہی ہے۔ اگرچہ ایکس اکاؤنٹ کو ہندوستان میں وی پی این (VPN) کے بغیر دیکھنا ناممکن بنا دیا گیا ہے، لیکن تنظیم کے بانی کا کہنا ہے کہ یہ ڈیجیٹل مزاحمت اب کسی صورت رکنے والی نہیں ہے۔’