باکو / لاہور: وزیراعلیٰ پنجاب مریم نواز شریف ایک اعلیٰ سطحی وفد کے ہمراہ آذربائیجان کے دارالحکومت باکو پہنچ گئی ہیں، جہاں ائیرپورٹ پر ان کا انتہائی شاندار اور پرتپاک خیر مقدم کیا گیا۔ وزیراعلیٰ مریم نواز شریف اپنے اس تین روزہ دورے کے دوران حکومتِ آذربائیجان کی خصوصی سرکاری مہمان ہوں گی۔
وزیراعلی پنجاب مریم نواز شریف کا وفد کے ہمراہ آذربائیجان کے دارالحکومت باکو پہنچنے پر پرتپاک خیر مقدم
وزیراعلی مریم نوازشریف اور وفد کا باکو ائیر پورٹ پرڈپٹی منسٹر ڈیفنس انڈسٹری مسٹر مہمان بوکسی سوف نے استقبال کیا
پاکستان میں آذربائیجانی سفیرخضر فرہادوف اوران کی… pic.twitter.com/mVoViDS7PK— Azma Zahid Bokhari (@AzmaBokhariPMLN) May 16, 2026
باکو ائیر پورٹ پہنچنے پر آذربائیجان کے ڈپٹی منسٹر ڈیفنس انڈسٹری مسٹر مہمان بوکسی سوف نے وزیراعلیٰ اور ان کے وفد کا گرمجوشی سے استقبال کیا۔ اس موقع پر سفارتی شخصیات بھی ائیرپورٹ پر موجود تھیں، جن میں پاکستان میں آذربائیجانی سفیر خضر فرہادوف اور ان کی اہلیہ،آذربائیجان میں پاکستانی سفیر قاسم محی الدین اور ان کی اہلیہ شامل ہیں۔
اپنے اس مصروف دورے کے دوران وزیراعلیٰ پنجاب کئی اہم عالمی اور دوطرفہ ملاقاتیں کریں گی۔وزیراعلیٰ مریم نواز شریف 17 مئی کو آذربائیجان کے صدر الہام علیوف سے خصوصی ملاقات کریں گی، جس میں باہمی دلچسپی کے امور پر گفتگو ہوگی۔
وہ باکو اولمپک اسٹیڈیم میں منعقد ہونے والی ‘ورلڈ لیڈرز سمٹ’ سے بھی خطاب کریں گی، جہاں وہ پاکستان کا مؤقف دنیا کے سامنے رکھیں گی۔
اس دورے کا ایک اہم ترین پہلو پاکستان کی عالمی سطح پر نمائندگی ہے۔ وزیراعلیٰ مریم نواز شریف باکو میں ہونے والے ’’ورلڈ اربن فورم‘‘ میں پاکستان کی گرین اور پائیدار ترقی کے عزم کا اظہار کریں گی۔