ممبئی (شوبز ڈیسک): بالی وڈ کی ورسٹائل اداکارہ ویدیا بالن نے اپنے آنجہانی ساتھی اداکار اور لیجنڈری اسٹار عرفان خان کی یاد میں ایک انتہائی جذباتی نوٹ شیئر کیا ہے۔ اداکارہ نے 25 سال پہلے شوٹ ہونے والی لیکن منظرِ عام پر نہ آنے والی فلم ‘دا لاسٹ ٹیننٹ’ (The Last Tenant) کے یوٹیوب پر اچانک ریلیز ہونے کے موقع پر اپنے دل کے ارمان کھول کر رکھ دیے۔
ویدیا بالن نے انسٹاگرام پر فلم کی جھلکیاں شیئر کرتے ہوئے بتایا کہ انہوں نے یہ فلم ڈھائی دہائیاں قبل شوٹ کی تھی، لیکن کسی وجہ سے یہ ریلیز نہ ہو سکی۔ انہوں نے انکشاف کیا کہ یہ ان کے کیریئر کا وہ دور تھا جب وہ شدید مشکلات کا شکار تھیں۔
View this post on Instagram
"یہ وہ وقت تھا جب میں جس چیز کو چھوتی تھی وہ بکھر جاتی تھی۔ میری پہلی ملیالم فلم ‘چکرم’ بند ہوگئی، اور تین سال کے عرصے میں مجھے تقریباً ایک درجن فلموں سے نکالا گیا۔”
ویدیا کا کہنا تھا کہ وہ ان ناکامیوں اور اس فلم کو بھلا چکی تھیں، یہاں تک کہ گزشتہ ہفتے ڈائریکٹر کے میسج نے انہیں حیران کر دیا۔
ویدیا بالن نے عرفان خان کی اداکاری کو خراجِ عقیدت پیش کرتے ہوئے ایک پرانی یاد تازہ کی۔ انہوں نے بتایا کہ جب وہ اس فلم کی شوٹنگ کر رہی تھیں تو انہوں نے جوش و خروش میں اپنی بہن کو فون کر کے بتایا تھا کہ:
"میں ‘بنے گی اپنی بات’ والے عرفان خان کے ساتھ شوٹ کر رہی ہوں! وہ اس وقت بھی سب سے بہترین اور فطری اداکار تھے، اور کل رات فلم دیکھتے ہوئے بھی مجھے یہی محسوس ہوا کہ ان کا کوئی ثانی نہیں۔”
اداکارہ نے انتہائی دکھ کے ساتھ یہ بھی بتایا کہ عرفان خان کی وفات (2020) کے بعد وہ اکثر اس بات پر کڑھتی تھیں کہ کچھ فلمیں جن میں وہ دونوں ساتھ کام کرنے والے تھے، وہ کبھی بن نہ سکیں، لیکن اب وہ خوش ہیں کہ کم از کم ان کے پاس ‘دا لاسٹ ٹیننٹ’ کی صورت میں ایک یادگار موجود ہے۔
یاد رہے کہ عرفان خان نہ صرف بھارت بلکہ ہالی وڈ (Life of Pi، Jurassic World) میں بھی اپنی اداکاری کا لوہا منوا چکے تھے۔ ویدیا بالن کا یہ پیغام سوشل میڈیا پر وائرل ہو رہا ہے اور عرفان خان کے مداحوں کی آنکھیں ایک بار پھر نم ہو گئی ہیں۔