کفایت شعاری مہم یا کچھ اور؟ امریکا نے پشاور میں قونصل خانہ بند کردیا

پشاور:امریکی محکمۂ خارجہ نے پاکستان کے شہر پشاور میں سکیورٹی خدشات کی وجہ سے اپنے قونصل خانے کو مرحلہ وار بند کرنے کا فیصلہ کیا ہے۔
منگل کو محکمۂ خارجہ کی جانب سے جاری ہونے والے بیان کے مطابق قونصلیٹ کے سفارتی عملے کی سلامتی کے حوالے سے یہ فیصلہ کیا گیا ہے۔
بیان کے مطابق وفاقی دارالحکومت اسلام آباد میں قائم امریکی سفارت خانہ اب صوبہ خیبر پختونخوا سے متعلق تمام سفارتی مصروفیات کو دیکھے گا۔محکمہ خارجہ کے مطابق ’یہ فیصلہ ہمارے سفارتی عملے کی حفاظت اور وسائل کے مؤثر انتظام کے عزم کی عکاسی کرتا ہے۔‘
امریکی محکمۂ خارجہ کے مطابق پشاور میں قونصل خانہ نہ ہونے کے باوجود پاکستان کے حوالے سے امریکی انتظامیہ کی پالیسی ترجیحات اپنی جگہ برقرار ہیں۔
بیان کے مطابق ’ہم خیبر پختونخوا کے عوام اور حکام کے ساتھ با معنی روابط جاری رکھیں گے تاکہ اقتصادی تعلقات کو فروغ دیا جا سکے، علاقائی سلامتی کو تقویت دی جا سکے اور امریکی عوام کے مفادات کو آگے بڑھایا جا سکے۔‘
بیان میں کہا گیا ہے کہ امریکی محکمۂ خارجہ اسلام آباد، کراچی اور لاہور میں موجود اپنے سفارتی دفاتر کے ذریعے امریکا، پاکستان تعلقات مضبوط بنانے کے لیے پُر عزم رہے گا۔
خبر رساں ادارے ایسوسی ایٹڈ پریس (اے پی) کے مطابق یہ اقدام اُس وقت سے زیر غور تھا جب سے ٹرمپ انتظامیہ نے تقریباً تمام وفاقی اداروں کے حجم میں کمی شروع کی۔ گذشتہ برس محکمۂ خارجہ میں کی جانے والی کٹوتیوں میں ہزاروں سفارتی اہلکاروں کی برطرفی اور امریکی ایجنسی برائے بین الاقوامی ترقی (یو ایس ایڈ) کا مکمل خاتمہ شامل تھا۔
اے پی کی 12 مارچ کی رپورٹ کے مطابق امریکی محکمۂ خارجہ نے قونصل خانے کی بندش سے کانگریس کو آگاہ کرتے ہوئے کہا تھا کہ اس اقدام سے سالانہ 75 لاکھ ڈالرز کی بچت ہو گی۔
اے پی نے محکمۂ خارجہ کے نوٹس کا حوالہ دیتے ہوئے بتایا کہ پشاور قونصل خانے میں 18 امریکی سفارت کار اور دیگر سرکاری اہلکار، جبکہ 89 مقامی ملازمین تعینات ہیں۔ اس نوٹس کے مطابق قونصل خانے کی بندش پر 30 لاکھ ڈالرز خرچ ہوں گے، جن میں سے 18 لاکھ ڈالرز اُن بکتر بند ٹریلرز کی منتقلی پر خرچ کیے جائیں گے جو عارضی دفتری جگہ کے طور پر استعمال ہو رہے تھے۔
بقیہ رقم قونصل خانے کی گاڑیوں کے بیڑے، الیکٹرانک اور ٹیلی کمیونیکیشن آلات اور دفتری فرنیچر کو اسلام آباد میں امریکی سفارت خانے اور کراچی اور لاہور میں موجود دیگر قونصل خانوں میں منتقل کرنے پر خرچ کی جائے گی۔