اسلام آباد: پاکستان میں ٹیلی کمیونیکیشن کے ایک نئے دور کا آغاز ہو گیا ہے۔ ملک کے صفِ اول کے نیٹ ورکس، زونگ (Zong) اور جاز (Jazz) نے اپنی آفیشل ویب سائٹس پر ان اسمارٹ فونز کی تفصیلات جاری کر دی ہیں جو اب پاکستان میں 5G انٹرنیٹ چلانے کے اہل ہیں۔
زونگ (Zong): آئی فون صارفین کے لیے سب سے آگے
زونگ نے بازی مارتے ہوئے آئی فون صارفین کو سب سے پہلے 5G کی خوشخبری سنائی ہے۔ زونگ کے نیٹ ورک پر آئی فون 12 سے لے کر حالیہ لانچ ہونے والے آئی فون 17 تک کے تمام ماڈلز 5G سپورٹ کریں گے۔ اس فہرست میں آئی فون SE اور آئی فون Air بھی شامل ہیں۔
سام سنگ کے حوالے سے زونگ کی فہرست کافی طویل ہے، جس میں Galaxy S20 سے لے کر Galaxy S25 سیریز تک کے تمام فونز شامل ہیں۔ اس کے علاوہ سام سنگ کی اے (A) اور ایم (M) سیریز کے کئی پرانے اور نئے ماڈلز بھی 5G استعمال کر سکیں گے۔
جاز (Jazz): سام سنگ کی نئی سیریز کے ساتھ میدان میں
جاز نے فی الحال محدود اسمارٹ فونز کے لیے 5G سپورٹ کا اعلان کیا ہے، جن میں سام سنگ کے جدید ترین ماڈلز Galaxy S26، S26 Ultra اور S26+ شامل ہیں۔ اس کے علاوہ Galaxy A55، A57 اور A37 بھی جاز کے 5G نیٹ ورک پر کام کریں گے۔
آئی فون کے حوالے سے جاز کا کہنا ہے کہ ایپل کی جانب سے سافٹ ویئر اپ ڈیٹ یا کیریئر سیٹنگز کے بعد آئی فونز پر 5G فعال ہو جائے گا، جس میں تھوڑا وقت لگ سکتا ہے۔
دوسری جانب یوفون کو پی ٹی اے (PTA) سے پاکستان بھر میں 5G سروسز شروع کرنے کی منظوری تو مل گئی ہے، تاہم ابھی تک کمپنی نے باقاعدہ لانچ کی تاریخ یا ہم آہنگ فونز کی فہرست جاری نہیں کی ہے۔
ماہرین کا کہنا ہے کہ 5G سروسز سے بھرپور فائدہ اٹھانے کے لیے صارفین اپنے فون کے سافٹ ویئر کو اپ ٹو ڈیٹ رکھیں اور اپنے نیٹ ورک آپریٹر کی ویب سائٹ سے اپنے ہینڈ سیٹ کی مطابقت لازمی چیک کریں۔
