واشنگٹن : امریکی شہریت و امیگریشن سروس نے مالی سال 2027 کے لیے ایچ ون بی (H-1B) ویزا کی مقررہ حد مکمل ہونے کا باضابطہ اعلان کر دیا ہے۔ یکم اپریل 2026 سے منتخب امیدواروں کے لیے درخواستیں جمع کرانے کے مرحلے کا آغاز ہو گیا ہے، تاہم اس بار قوانین میں ایسی تبدیلیاں کی گئی ہیں جن سے مقابلہ پہلے سے کہیں زیادہ سخت ہو گیا ہے۔
ادارے کے مطابق الیکٹرانک رجسٹریشن کے عمل میں سے مطلوبہ تعداد میں امیدواروں کا انتخاب کر لیا گیا ہے۔ جن افراد کا نام قرعہ اندازی میں نکلا ہے، انہیں ان کے آن لائن اکاؤنٹس کے ذریعے مطلع کر دیا گیا ہے۔
درخواست کی مہلت: منتخب امیدوار یکم اپریل سے اگلے 90 دنوں کے اندر اپنی مکمل درخواستیں جمع کرا سکتے ہیں۔
لازمی شرط: ہر درخواست کے ساتھ ‘سلیکشن نوٹس’ کی کاپی لگانا ضروری ہے، بصورتِ دیگر درخواست مسترد کر دی جائے گی۔
نئے قوانین: ایک لاکھ ڈالر کی اضافی شرط
اس سال سے امریکی حکومت نے مالی شرائط میں غیر معمولی سختی کر دی ہے۔
اضافی فیس: مخصوص معیار پر پورا اترنے والی بعض درخواستوں کے ساتھ ایک لاکھ ڈالر کی اضافی ادائیگی لازمی قرار دی گئی ہے۔
نیا ورژن: یکم اپریل سے صرف فارم I-129 کا جدید ترین ورژن ہی قبول کیا جائے گا، پرانے فارمز پر دی گئی درخواستیں ردی کی ٹوکری میں جائیں گی۔
‘زیادہ تنخواہ، پہلے ویزا’:
امریکی امیگریشن سروس نے اس بار روایتی لاٹری کے بجائے ایک ’ویٹڈ سلیکشن سسٹم‘ متعارف کرایا ہے۔
اس نظام کے تحت ان امیدواروں کو ترجیح دی جائے گی جن کی مہارت زیادہ ہے اور جنہیں امریکی کمپنیاں زیادہ تنخواہ دینے کی پیشکش کر رہی ہیں۔
اس کا مقصد صرف اعلیٰ درجے کے پیشہ ور افراد کو امریکہ لانا ہے تاکہ مقامی معیشت کو زیادہ فائدہ پہنچ سکے۔
واضح رہے کہ امریکی کانگریس نے سالانہ ویزوں کی حد 65,000 مقرر کر رکھی ہے، جبکہ 20,000 ویزے ان افراد کے لیے مخصوص ہیں جنہوں نے امریکی یونیورسٹیوں سے ماسٹرز یا اس سے اعلیٰ ڈگریاں حاصل کر رکھی ہیں۔
امریکی امیگریشن حکام نے واضح کیا ہے کہ قرعہ اندازی میں نام آنے کا مطلب ہرگز یہ نہیں کہ ویزا منظور ہو گیا ہے۔ امیدواروں کو اپنی تعلیمی اسناد، ملازمت کی تفصیلات اور پاسپورٹ کی درستگی ثابت کرنا ہوگی۔ کسی بھی ایسی معلومات کی فراہمی جو ابتدائی رجسٹریشن سے مطابقت نہ رکھتی ہو، ویزا کی منسوخی کا سبب بنے گی۔
ایچ ون بی ویزا پروگرام میں یہ تبدیلیاں ظاہر کرتی ہیں کہ امریکہ اب صرف ‘افرادی قوت’ نہیں بلکہ ‘اعلیٰ ٹیلنٹ’ کا خواہاں ہے۔ ایک لاکھ ڈالر کی اضافی شرط اور تنخواہ کی بنیاد پر ترجیح دینے کا مقصد ویزا پروگرام کا غلط استعمال روکنا اور صرف ان کمپنیوں کو موقع دینا ہے جو واقعی مہنگے اور قابل ہنرمندوں کی ضرورت رکھتی ہیں۔
امریکی ویزا مشن 2027: ایچ ون بی کی رجسٹریشن مکمل، ‘پہلے آئیے پہلے پائیے’ دور ختم؛ صرف ‘اعلیٰ مہارت اور بھاری تنخواہ’ والوں کی لاٹری نکلے گی!
