پسرور (محمد اشفاق – بے نقاب نیوز)
تھانہ بڈیانہ کے علاقے میں سکول گئے 3 کمسن بہن بھائیوں کے اچانک لاپتہ اور مبینہ طور پر اغوا ہونے کے مقدمے کا ڈراپ سین ہو گیا ہے۔ پولیس کی فوری کارروائی سے معلوم ہوا کہ بچے اغوا نہیں ہوئے تھے بلکہ خود گھر چھوڑ کر ڈسکہ میں اپنی حقیقی والدہ کے پاس چلے گئے تھے۔ بچوں کے والد کے مطابق تینوں بچے سکول گئے لیکن واپس نہ لوٹے۔ اغوا کے خدشے پر والد نے تھانہ بڈیانہ میں نامعلوم افراد کے خلاف مقدمہ درج کروایا۔ ڈی پی او سیالکوٹ کی ہدایت پر ایس ایچ او تھانہ بڈیانہ عرفان ڈھلو نے پولیس ٹیم کے ہمراہ جدید تکنیکی و سائنسی ذرائع کا استعمال کرتے ہوئے فوری تفتیش شروع کی اور بچوں کا سراغ لگا لیا۔ تحقیقات میں سامنے آیا کہ تینوں بچے اپنی سوتیلی والدہ کے رویے سے تنگ آ کر خود گھر سے نکلے اور ڈسکہ میں موجود اپنی حقیقی والدہ کے پاس پہنچ گئے تھے۔ پولیس نے قانونی کارروائی مکمل کرنے کے بعد تینوں بچوں کو بحفاظت ان کی حقیقی والدہ کے سپرد کر دیا۔ والدین اور سرپرست بچوں کے رویوں، خوف اور گھریلو مسائل کو ہرگز نظر انداز نہ کریں اور ان کے ساتھ اعتماد کا تعلق قائم رکھیں تاکہ بچے ایسا کوئی قدم نہ اٹھائیں۔ بچے لاپتہ ہونے کی صورت میں بغیر کسی تاخیر کے پولیس کو اطلاع دیں تاکہ بروقت کارروائی سے کسی بھی بڑے حادثے سے بچا جا سکے۔