لاہور :(خرم عباس)
صوبائی دارالحکومت کے علاقے کاہنہ میں واقع نجی ہاؤسنگ سوسائٹی ‘خیابانِ امین’ میں سی سی ڈی پولیس نے ڈاکوؤں کی گرفتاری کے لیے چھاپہ مارا۔ کارروائی کے دوران ملزمان نے پولیس پر فائرنگ کر دی، جس کے نتیجے میں کانسٹیبل رزاق ڈوگر موقع پر شہید جبکہ دو اہلکار زخمی ہو گئے۔
سی سی ڈی کے مطابق جوابی فائرنگ میں دو خطرناک ڈاکو ہلاک ہو گئے، جبکہ دو ملزمان فرار ہونے میں کامیاب ہو گئے۔ ہلاک ہونے والے ملزمان متعدد سنگین وارداتوں میں ملوث تھے، جن کی شناخت کا عمل جاری ہے۔ زخمی اہلکاروں کو فوری طور پر قریبی اسپتال منتقل کر دیا گیا ہے، جبکہ واقعے کی اطلاع ملتے ہی سی سی ڈی کی بھاری نفری موقع پر پہنچ گئی۔
پولیس حکام کے مطابق شہید کانسٹیبل کی لاش پوسٹ مارٹم کے لیے بھجوا دی گئی ہے اور فرار ملزمان کی گرفتاری کے لیے سرچ آپریشن جاری ہے۔
واقعے کے بعد پولیس کی بھاری نفری نے علاقے کو گھیرے میں لے کر سرچ آپریشن شروع کر دیا ہے۔ آئی جی پنجاب عبدالکریم اور سی سی پی او لاہور بلال صدیق کمیانہ نے شہید کانسٹیبل کی قربانی کو خراجِ عقیدت پیش کرتے ہوئے زخمی اہلکاروں کو بہترین طبی سہولیات فراہم کرنے کی ہدایت کی ہے۔