آپریشن غضب للحق: افغان طالبان رجیم کے 641 کارندے ہلاک اور 855 زخمی، 243 فوجی چیک پوسٹیں تباہ اور 42 پر پاکستان کاقبضہ

اسلام آباد :وفاقی وزیر اطلاعات عطاء اللہ تارڑ نے کہا ہے کہ آپریشن غضب للحق میں افغان طالبان رجیم کے 641 کارندے ہلاک اور 855 سے زائد زخمی کردیئے گئے ہیں۔ ایکس پر وفاقی وزیراطلاعات عطاء اللہ تارڑ نے آپریشن غضب للحق میں افغان طالبان کے نقصانات پر اپنے بیان میں کہا کہ سکیورٹی فورسز نے آپریشن غضب للحق میں افغان طالبان رجیم کے 641 کارندے ہلاک اور 855 سے زائد زخمی کردیئے گئے۔
افغان طالبان کی اب تک 243 فوجی چیک پوسٹیں تباہ کردی گئیں، جبکہ 42 پوسٹوں پر قبضہ کرلیا گیا ہے۔ افغان طالبان رجیم کے 219 ٹینک اور مسلح گاڑیاں تباہ کردی گئیں۔ افواج پاکستان کی فضائی کارروائیوں میں افغانستان میں 65 مقامات پر اہداف کو نشانہ بنایا گیا ہے۔
مزید برآں پاک فوج کی دہشتگردوں کے ٹھکانوں کو تباہ کرنے کی کارروائیاں جاری ہیں۔ مزید برآں پاکستان کی طرف سے جاری آپریشن غضب للحق کے دوران ژوب سیکٹر میں طالبان پوسٹیں چھوڑ کر فرار ہوگئے۔
سکیورٹی ذرائع کے مطابق آپریشن غضب للحق کے دوران افغان طالبان اور فتنہ الخوارج کیخلاف پاک افواج کی مؤثر جوابی کارروائیاں جاری ہیں جہاں پاک فوج نے پاکستان اور افغانستان کی سرحد پر ژوب سیکٹر میں افغان طالبان کی پوسٹ نمبر 2 اور 3 کو نشانہ بنایا، پاک فوج کی بروقت اور بھرپور کارروائی سے بزدل افغان طالبان پوسٹیں اور اسلحہ چھوڑ کر فرار ہوگئے۔
سکیورٹی ذرائع کا کہنا ہے کہ پاک فوج نے افغان طالبان کے زیرِ قبضہ پوزیشنوں سے روسی ساختہ 73 ملی میٹر HGL9 ہیوی گرینیڈ لانچرز قبضے میں لے لیے، پاک فوج کی طاقتور جوابی کارروائیاں بھارتی پراکسی افغان طالبان اور فتنہ الخوارج کو بھاگنے پر مجبور کر رہی ہیں، آپریشن غضب للحق جاری ہے اور اپنے اہداف کے حصول تک جاری رہے گا۔ سکیورٹی ذرائع نے بتایا کہ پاک فوج کی جانب سے سرحدی باڑ کی حفاظت اور دراندازی روکنے کیلئے بھی کارروائیاں جاری ہیں، اسی دوران پاک افغان بارڈر پر چمن سیکٹر سے ملحقہ سرحدی علاقے میں 3 سے 4 خوارج پر مشتمل تشکیل کی دراندازی کو ناکام بنا دیا گیا جہاں پاک فوج نے باڑ کاٹنے والے خوارج کو مؤثر طریقے سے نشانہ بنایا، بروقت کارروائی کے دوران فائرنگ کے تبادلے میں ایک خارجی دہشتگرد ہلاک جبکہ دیگر زخمی حالت میں فرار ہوگئے، خارجی دہشت گردوں سے تیار شدہ 4 سے 5 آئی ای ڈیز اور باڑ کاٹنے کا سامان بھی برآمد ہوا، پاک فوج کی منظم کارروائی سے دہشت گردوں کے منصوبے خاک میں مل گئے۔