دبئی (نیوز ڈیسک): دبئی ایئرپورٹس کے سی ای او پال گریفتھس نے دبئی انٹرنیشنل (DXB) اور دبئی ورلڈ سینٹرل (DWC) پر پروازوں کی محدود بحالی کی تصدیق کرتے ہوئے کہا ہے کہ اس ‘ریکوری فیز’ کے دوران آپریشنز کی کڑی نگرانی کی جا رہی ہے۔
پال گریفتھس نے دبئی پولیس اور جنرل ڈائریکٹوریٹ آف ریزیڈنسی اینڈ فارنرز افیئرز (GDRFA) کے اعلیٰ حکام کے ہمراہ خود گراؤنڈ پر موجود رہ کر فرنٹ لائن ٹیموں کی کارکردگی کا جائزہ لیا۔ انہوں نے مشکل وقت میں ٹیموں کی ہمت اور ثابت قدمی کو سراہتے ہوئے کہاکہ”گزشتہ چند دن غیر معمولی اور چیلنجنگ تھے، لیکن ہم باہمی تعاون اور حوصلے کے ساتھ اعتماد کے ساتھ آگے بڑھ رہے ہیں۔”
ایمریٹس ایئر لائن: معطلی میں مزید توسیع
خطے میں جاری فوجی تصادم اور فضائی حدود کی بندش کے باعث، دبئی کی سرکاری ایئر لائن ‘ایمریٹس’ نے اپنی تمام طے شدہ پروازوں کی معطلی میں ہفتہ، 7 مارچ کی رات 11:59 بجے تک توسیع کر دی ہے۔
ایمریٹس اس وقت صرف انتہائی محدود فلائٹ شیڈول کے تحت کام کر رہی ہے۔پروازوں کی معطلی کی بنیادی وجہ پورے خطے میں فضائی حدود کا بند ہونا ہے، جس نے بین الاقوامی روٹس کو بری طرح متاثر کیا ہے۔
مسافروں کے لیے اہم ہدایت
ایئرپورٹ حکام نے مسافروں کو ہدایت کی ہے کہ وہ ایئرپورٹ آنے سے قبل اپنی متعلقہ ایئر لائنز سے پرواز کی تصدیق ضرور کریں، کیونکہ آپریشنز صرف محدود بنیادوں پر ہی بحال کیے گئے ہیں۔