لاہور میں خونی بسنت،پہلے روز دو نوجوان جاں بحق،تین بچوں سمیت ڈور پھرنے سے 76 زخمی

لاہور:لاہور میں خونی بسنت کا کھیل جاری، پہلے روز دو نوجوان ہلاک،، اور 76 زخمی ہوئے ڈور پھرنے کرنٹ لگنے چھت سے گرنے پتنگ لوٹنے پر جھگڑے کے دوران یہ واقعات ہوئے۔
تفصیلات کے مطابق سکھ نہر کے قریب 25 سالہ علی رشید کٹی پتنگ اتارنے کے لیے بجلی کے کھمبے پر چڑھ گیا، جہاں اسے کرنٹ لگنے کے باعث موقع پر ہی موت واقع ہو گئی۔مدینہ کالونی باغبانپورہ میں 18 سالہ نوجوان زین پتنگ پکڑتے ہوئے چھت سے گر کر جاں بحق ہو گیا۔ متوفی والدین کا اکلوتا بیٹا تھا، ریسکیو حکام نے ضروری کارروائی کے بعد متوفی کی لاش ورثاء کے حوالے کر دی۔
شہر کے دیگر علاقوں میں بھی پتنگ بازی کے دوران مختلف حادثات رپورٹ ہوئے۔ گلشنِ راوی میں آٹھ سالہ بچی ارحا کے گلے پر پتنگ کی ڈور لگنے سے وہ زخمی ہو گئی، جبکہ چودہ سالہ سلمان درخت پر چڑھ کر پتنگ اتارنے کی کوشش میں زخمی ہو گیا۔  جبکہ لوئر مال پتنگ لوٹتے 12 سالہ عبد الواحد زخمی ہوگیا۔والٹن میں پتنگ بازی پر جھگڑا اور فائرنگ، چار افراد زخمی ہو گئے۔ زخمیوں میں محمد علی،بلال،عمر اور وقاص شامل ہیں۔
DHAفیز 5 میں پتنگ کی ڈور پھرنے سے 21 سالہ رافیع تنویراورگلشن راوی میں 45سالہ شبیرزخمی،دونوں کو طبی امداد کےلیے اسپتال منتقل کردیاگیا،دونوں موٹر سائیکل پر گھر جا رہے تھے ، بائیک پر حفاظتی راڈ بھی لگا ہوا تھا
ریسکیو حکام کے مطابق تمام زخمیوں کو بروقت طبی امداد فراہم کی گئی اور شہر کے مختلف اسپتالوں میں داخل کرایا گیا ہے۔
ریسکیو اداروں نے بسنت کے دوران شہریوں بالخصوص والدین سے اپیل کی ہے کہ وہ حفاظتی اقدامات کو ہرگز نظر انداز نہ کریں اور بچوں کو چھتوں، درختوں اور بجلی کے کھمبوں جیسے خطرناک مقامات پر جانے سے روکیں۔