سونے کی قیمتوں کوپر لگ گئے،ہوش رہا اضافہ، عام آدمی کےبعد اب خواص کی پہنچ سے بھی باہر

کراچی/لاہور : پاکستان سمیت عالمی صرافہ مارکیٹ میں سونے اور چاندی کی قیمتوں میں زبردست تیزی دیکھی گئی ہے۔ مقامی مارکیٹ میں سونے کی قیمت ایک ہی دن میں ہزاروں روپے بڑھنے کے بعد ملکی تاریخ کی بلند ترین سطح پر پہنچ گئی ہے، جس نے عام خریداروں اور جیولرز کے ہوش اڑا دیے ہیں۔
آج مقامی صرافہ مارکیٹ میں سونے کی قیمت میں 6,100 روپے کا بڑا اضافہ ریکارڈ کیا گیا۔
اس اضافے کے بعد:
فی تولہ سونا: 5 لاکھ 39 ہزار 862 روپے کی ریکارڈ سطح پر آگیا ہے۔
10 گرام سونا: 5,230 روپے مہنگا ہونے کے بعد 4 لاکھ 62 ہزار 844 روپے کی سطح پر پہنچ گیا ہے۔
عالمی سطح پر بھی سونے کی طلب میں غیر معمولی اضافہ دیکھا گیا ہے۔ انٹرنیشنل مارکیٹ میں فی اونس سونا 61 ڈالر مہنگا ہوا۔
عالمی منڈی میں اب سونے کی قیمت 5,171 ڈالر فی اونس ہو چکی ہے۔تجزیہ کاروں کے مطابق، مشرقِ وسطیٰ میں ایران، امریکہ اور اسرائیل کے درمیان بڑھتی ہوئی کشیدگی نے عالمی کرنسیوں کے مقابلے میں سونے کی قیمت کو اس غیر معمولی سطح پر پہنچا دیا ہے۔
چاندی کی قیمت میں بھی اضافہ
صرف سونا ہی نہیں، بلکہ چاندی کی قیمت میں بھی اضافے کا رجحان برقرار رہا۔ مقامی مارکیٹ میں چاندی کی فی تولہ قیمت میں 17 روپے کا اضافہ ہوا، جس کے بعد اس کی نئی قیمت 8,931 روپے مقرر کی گئی ہے۔
معاشی ماہرین کا کہنا ہے کہ جب تک عالمی سطح پر جنگ کے بادل نہیں چھٹتے اور معاشی غیر یقینی صورتحال ختم نہیں ہوتی، سونے کی قیمتوں میں کمی کا کوئی امکان نظر نہیں آتا۔ مقامی سطح پر روپے کی قدر میں اتار چڑھاؤ بھی اس اضافے کی ایک بڑی وجہ ہے۔