وزیراعلیٰ خیبر پختونخوا سہیل آفریدی کے ناقابل ضمانت وارنٹ گرفتاری، پورا نظام بوکھلا گیا، سلمان اکرم راجا ایڈووکیٹ

اسلام آباد :قومی سلامتی کے اداروں پر گمراہ کن الزامات لگانے کے کیس میں وزیر اعلیٰ خیبرپختونخوا سہیل آفریدی کے ناقابل ضمانت وارنٹ گرفتاری جاری کر دیے گئے۔
اسلام آباد کے سینیئر سول جج عباس شاہ نے سہیل آفریدی کے خلاف کیس کی سماعت کی، اور عدم حاضری پر سہیل آفریدی کے ناقابل ضمانت وارنٹ گرفتاری جاری کیے۔ عدالت نے کیس کی مزید سماعت 10 فروری تک کے لیے ملتوی کردی۔
واضح رہے کہ وزیراعلیٰ خیبرپختونخوا سہیل آفریدی کے خلاف پیکا ایکٹ کے تحت این سی سی آئی اے نے مقدمہ درج کر رکھا ہے۔
دوسری جانب پی ٹی آئی کے سیکریٹری جنرل سلمان اکرم راجا نے کہا ہے کہ وزیراعلیٰ سہیل آفریدی کے خلاف جھوٹے مقدمات کی بھرمار کردی گئی ہے۔ فارنزک کروا کر انہیں 3 سال قبل کے ریڈیو پاکستان کے کسی حملے میں ملوث کرنے کی کوشش کی گئی ہے۔
انہوں نے کہاکہ الیکشن کمیشن نے بھی انہیں ایک نوٹس دے دیا ہے کہ کیوں نا آپ کو نااہل قرار دیا جائے، یہ سہیل آفریدی کو کراچی میں ملنے والی پذیرائی سے خوفزدہ ہیں۔
سلمان اکرم راجا نے کہاکہ جس طرح سے عوام والہانہ نکلے اس سے یہ پورا نظام بوکھلا گیا ہے۔