پاکپتن(رپورٹ:اکرام حسین شاہ )

تھانہ ملکہ ہانس کی حدود میں ایک انتہائی دلخراش واقعہ پیش آیا ہے جہاں نامعلوم ملزمان نے 70 سالہ بزرگ شہری کو زندہ جلانے کی کوشش کی، تاہم پولیس اور اہلِ علاقہ کی بروقت کارروائی سے بزرگ کی جان بچا لی گئی۔
پولیس حکام کے مطابق ملکہ ہانس کے علاقے میں نامعلوم ملزمان نے 70 سالہ بزرگ اختر علی کے ہاتھ پاؤں اور منہ باندھ کر انہیں کمرے میں بند کیا اور بعد ازاں گھر کو آگ لگا دی۔
آگ بھڑک اٹھنے پر اہلِ علاقہ اور پولیس نے فوری طور پر موقع پر پہنچ کر ریسکیو آپریشن کیا اور بزرگ اختر علی کو بحفاظت باہر نکال کر زندہ جلنے سے بچا لیا۔ اطلاع ملتے ہی پولیس کی بھاری نفری اور امدادی ٹیمیں بھی جائے وقوعہ پر پہنچ گئیں۔
پولیس کا کہنا ہے کہ واقعے کے محرکات جاننے کے لیے شواہد اکٹھے کر لیے گئے ہیں اور نامعلوم ملزمان کی تلاش و گرفتاری کے لیے مزید تفتیش جاری ہے۔


