لیما (بے نقاب نیوز)
جنوبی امریکی ملک پیرو کے وسطی پہاڑی سلسلے اینڈیز میں 6.7 شدت کا شدید زلزلہ ریکارڈ کیا گیا ہے، جس کے جھٹکے دارالحکومت لیما سمیت قریبی علاقوں میں بھی واضح طور پر محسوس کیے گئے تاہم خوش قسمتی سے تاحال کسی جانی یا مالی نقصان کی اطلاع موصول نہیں ہوئی۔
امریکی جیولوجیکل سروے (USGS) اور پیرو کے جیو فزیکل انسٹی ٹیوٹ (IGP) کے مطابق زلزلہ مقامی وقت کے مطابق جمعہ کی شام 7 بج کر 9 منٹ پر آیا۔ زلزلے کا مرکز وسطی پیرو کے شہر خونین (Junín) سے تقریباً 30 سے 34 کلومیٹر شمال مغرب میں کارہوامایو (Carhuamayo) کے قریب واقع تھا، جبکہ اس کی زیرِ زمین گہرائی 108 سے 129 کلومیٹر کے درمیان ریکارڈ کی گئی۔
زلزلے کے شدید جھٹکوں کے باعث دارالحکومت لیما اور دیگر شہروں میں خوف و ہراس پھیل گیا اور شہری کلمہ طیبہ کا ورد کرتے ہوئے گھروں اور عمارتوں سے باہر کھلے مقامات پر نکل آئے۔ حکام کا کہنا ہے کہ مرکزِ زلزلہ سمندر سے دور پہاڑی علاقے میں ہونے کے باعث سونامی کا کوئی خطرہ نہیں ہے۔
پیرو کے جیو فزیکل انسٹی ٹیوٹ کے سربراہ ہرنینڈو تاویرا کے مطابق زلزلے کی گہرائی زیادہ ہونے کی وجہ سے بڑے پیمانے پر تباہی کا خدشہ کم ہے، تاہم بعض پہاڑی مقامات پر لینڈ سلائیڈنگ کا امکان موجود ہے۔ مقامی حکام اور سول ڈیفنس کے ادارے متاثرہ علاقوں سے مزید تفصیلات جمع کر رہے ہیں۔
واضح رہے کہ پیرو بحرالکاہل کے آتش فشانی اور زلزلہ خیز حلقے "رنگ آف فائر” (Ring of Fire) پر واقع ہے، جہاں اکثر زلزلے آتے رہتے ہیں۔ رواں سال اگست میں بھی پیرو کے اینڈیز سلسلے میں 6.7 شدت کا زلزلہ آیا تھا جس میں دو افراد زخمی اور متعدد عمارتوں کو نقصان پہنچا تھا۔

