بھریا سٹی (رپورٹ: مجاہد علی مغل)

بھریا سٹی کے قریب دیہہ کانجھر میں راجپوت برادری نے بااثر افراد کی مبینہ زیادتیوں اور زمین پر قبضے کی کوششوں کے خلاف شدید احتجاج کیا ہے۔
احتجاج کرنے والے ندیم راجپوت، امیر حمزہ، محمد رمضان راجپوت، جان محمد بروہی، عطا محمد سولنگی، شوکت کنیال اور دیگر نے میڈیا سے گفتگو کرتے ہوئے کہا کہ دیہہ کانجھر میں ان کی ساڑھے 8 ایکڑ زرعی زمین واقع ہے، جس کی ملکیت کے کاغذات ان کے پاس موجود ہیں۔ ان کا الزام ہے کہ مخالف فریق مختلف حربوں سے دباؤ ڈال کر زمین خالی کرانا چاہتا ہے۔
متاثرین کے مطابق مسمات انوری اپنے ہاری حاجی سولنگی، مسمات کوثر راجپوت، جمشید اور دیگر بااثر افراد کے ہمراہ ان کی زرعی زمین پر زبردستی قبضہ کرنا چاہتی ہیں، جس کے باعث انہیں کاشتکاری سے روکا جا رہا ہے اور زمین پر زبردستی ٹریکٹر بھی بند کرایا گیا ہے۔
انہوں نے مؤقف اختیار کیا کہ اس معاملے کا مقدمہ عدالت عالیہ میں زیر سماعت ہے، جبکہ ڈی ایس پی بھریا نے بھی انہیں طلب کر کے زمین کے کاغذات دیکھنے کے بعد کاشتکاری کی اجازت دی تھی، تاہم حاجی سولنگی انوری بیگم کے کہنے پر فساد کرا رہا ہے۔ راجپوت برادری کا کہنا ہے کہ انہوں نے کسی کو دھمکیاں نہیں دیں اور وہ صرف اپنی زمین آباد کرنا چاہتے ہیں۔
احتجاجی افراد نے ایس ایس پی نوشہروفیروز، ڈی ایس پی بھریا سٹی اور دیگر اعلیٰ حکام سے مطالبہ کیا ہے کہ واقعے کی شفاف تحقیقات کر کے انہیں فوری انصاف فراہم کیا جائے۔

